憑《空櫈》及《結他低泣時》等金曲唱紅的「香港搖滾之父」夏韶聲，現年62歲的他經歷四段婚姻風流過人，第四任老婆是越南華僑前首富千金Tina，05年已屆53之齡的夏韶聲，在美國羅省認識從事時裝生意、當時38歲的富家千金Tina，兩人相識僅4日即閃婚，Tina不但有米兼樣靚身材正，婚後更豪擲200萬美元（約港幣1,600萬）在羅省買入4萬呎獨立屋作愛巢，怎知兩人婚姻只維持9年即玩完，於去年7年正式離婚。

昨日夏韶聲接受本報電話訪問爆離婚原因，自言不愛食軟飯做金絲雀的他說：「唔啱咪離，離婚好普通事，大家心都安落，我咁大個仔未試過咁鬆動，我諗佢愛得我太犀利，24小時打電話畀我，打到我都煩，呢啲我了解，嗰時我哋糖黐豆嘛，o依家佢開心，我又鬆動，可以專心工作。」

第四次離婚會否好傷感？他坦言：「冇傷感，幾開心，佢都好開心，其實蘊釀咗6、7年，我成日返嚟做嘢，佢做生意唔可以跟我返嚟，大家生活方式唔同，好難落去。佢好似嫁咗人啦，好快咋，佢話有第二個對象話要結婚，梗係簽紙（離婚）畀人結啦。」夏韶聲否認兩人之間出現第三者：「我哋舊年簽紙，但其實分開咗兩年，佢o依家老公非常之有錢。」問前妻是否嫌你冇錢？夏韶聲說：「咁又唔係，呢啲早就知，我係歌手，佢老公係銀行家差好遠。」

由於兩人簽有婚前協議，離婚後不得分身家，他承認：「呢個係佢提議，我都有提議過，佢知我係好人，離婚時佢話多謝我，因為我冇話反對搞搞震要攞幾多錢，我諗都冇諗過要佢啲錢。」問結婚多年Tina曾否送物業、靚車給他？夏韶聲說：「唔需要，自己都有，咁大個仔冇要過人哋嘢，不過我有嘢喺佢度，成個錄音房啲樂器喺佢度，未諗到點攞返嚟。」

問現有否新女友？他自豪說：「女朋友大把，但梗係唔再結婚，19歲到o依家先叫單身，要享受吓，鍾意去邊就去邊，唔使再俾人詐型。」新女友是否有錢女？他說：「唔好提，最緊要阿叔開心。」其實3年前曾傳夏韶聲背妻偷嗒25歲女粉絲Isabel，兩人被雜誌影到返夏韶聲屋企共度一夜，事後他解釋Isabel只是侄女，否認對老婆不忠。