http://soundcloud.com/user783884318/2013-8-3

記得第一次聽《黃金時代》，係幾年前既事情
無錯，我唔係聽陳奕迅長大，甚至有一段時間冇聽香港流行曲
後來就算聽返，都係聽楊千嬅多

中學有一年，鍾意左個同學，姑且叫佢做 Niki
佢好鍾意陳奕迅，每次演唱會都睇，每次唱 K 都唱，慢慢我都開始聽陳奕迅
其實我諗我一路都唔係話鍾意陳奕迅，不過佢 D 歌咁易上口，曲詞又寫得好，唔難令人喜歡的

其中一首我第一次聽就愛上既，就係呢首《黃金時代》
當時字面上都知首歌講乜，又有嗌位，冇幾耐之後，就錄左一次
錄完之後，我仲係 MSN 比左 Niki 聽，佢仲話我唱得好，我不知幾開心

中五會考之後，Niki 原校升中六，我就要轉校讀，我地從此就好少見面
但係我朝早搭巴士返學，會經過佢屋邨門口，有時會咁岩望到佢行出邨口
從此以後，我都專登遲少少返學，搭會係 7:50 經過佢條邨門口班車
慢慢咁，又過左一段時間

其實係中六中七入面，我唔係冇同其他人曖昧過，例如……又姑且叫做 Stephy
我同 Stephy 試過為左大家，一齊凌晨五點鐘起身去麥當勞食早餐
我外婆過身既時候，夜晚十一點幾我第一個電話就係打比 Stephy
但好衰唔衰，有時一見到 Niki，以前單戀既回憶又出返哂黎
你問我究竟鍾意邊個，我真係答唔到你，可能我兩個都鍾意，又或者，兩個都唔夠鍾意
我有時同 Stephy 行得好埋，但最終我地都冇係埋一齊

漸漸，我越來越大個
對越來越多人有 Feel，但係我越來越唔知道自己既感覺
點解我心入面好似咁多人既？
由 Niki，到 Stephy，到 Kary，到 Kay，到……
我有時會諗，呀，如果 Kary 有一日同我講，佢暗戀左我好耐，我可能都會同佢一齊
但係我始終都唔會忘記同 Stephy 既一切

有一日，同班好耐冇見既中學同學見面，我地去左唱 K
有個叫 鄭裂鯨 既同學同我講，喂，偷仔，你唱歌唔同左既，
過左幾日，我就錄左今日 post 出黎呢段《黃金時代》。
錄完之後，拎返自己幾年前錄起既《黃金時代》聽，有對比之下，的確係唔同左
我以前既優點係把聲比較清脆，咬字比較實，音域亦比較闊
而家既進步主要係修飾或者 Technical 上既野，字與字之間連貫左，整體穩定左圓滑左

其實有好多成長、經驗、個人既事想講
但係唔知點講起好，都打左好多了，Too Long，就此擱下

最後，我係膠登唔活躍，最多發言應該只係氣象 post，但我冇返隔離 Forum
好希望大家會繼續留係呢一片淨土，
雖然上左膠登唔係好耐，上網亦唔應該太認真，但我愛膠登。