http://hk.apple.nextmedia.com/enews/realtime/20150207/53415380

巨聲幫出身嘅馮允謙（Jay），突然被指與宇宙巨G.E.M.鄧紫棋撻着，佢今午為林志美演唱會綵排時行色匆匆，只係苦笑話唔係拍拖。

今晚佢再次回應與G.E.M.拍拖報道，Jay表示:「唔係，我哋只係普通朋友，喺教會認識，係一班朋友出去玩。」

講到G.E.M舊愛林宥嘉因為喺facebook公開戀情，同女友丁文琪隔空耍花槍，點知G.E.M.又晒咗同Jay一齊去嘉年華玩嘅合照，被指係向舊愛示威。被問到會否覺得被擺上枱？Jay輕鬆表示：「冇乜嘢﹗一班朋友去玩。」

對於同G.E.M.齊戴口罩，被指好有默契，佢就解釋：「最近好多人病，我都怕怕，所以至會戴，總之我哋係好朋友。」

咁佢覺得G.E.M為人點樣？佢就大讚對方：「好欣賞佢，跳得唱得，總之我覺得佢係好人。」

咁有冇機會發展呢？Jay強調希望喺工作上有進步：「冇諗拍唔拍拖，如果好夾咪嚟囉﹗focus音樂度先。」佢坦承之前有出席對方生日會，而藝人之間可以有朋友關係。