我沿住條幾淺嘅河涉水而行，四週風和日麗，流水淙淙聲不斷，沿路七彩花草生得茂盛。柔和嘅陽光照耀下，我就好似置身於彩虹之中。

行左一排之後就去到盡頭，小河變成一個飛流直下三千尺嘅瀑布，底部只見一團迷霧。我諗都冇諗就一野跳落去。

飛過陣霧之後，我跳到落一片泥地，每行一步都jap jap聲。冇幾耐前面有個鐵門。我唔知我去緊邊，但我肯定係向前行。入去之後就係條迂迴曲折嘅紅磚走廊，兩邊係高不見頂嘅崖壁，我唯有繼續行。

之後離開走廊，前面有個九巴巴士站，有部吉車。站後面就係我住嘅屋苑。

走入我屋苑之後，四週圍都係人，男女老幼，應有盡有。個個都一路行一路同身邊人傾計，氣氛非常輕鬆。

行到一半，發現啲牆同柱上面都出曬草同藤，但係睇落又充滿生命力，非常迷幻。

去到盡頭我見倒有間入口落去一個地庫，入去果陣有兩個細路攞住燈籠好開心咁跑出黎，我讓一讓路之後繼續落去。

落到去，聽倒有個細路同其他人講野：「啊叔你第代扮人啊」
我一望，發現佢唔係一個細路
準確啲黎講，佢係一隻生物，手上攞住件人皮。

而前面鋪頭入面，就好似乾洗鋪咁掛信幾千件唔同款人皮。

啲生物得閒就會落黎，換一套皮，換一個身份。

我全身肌肉拉緊，神經好似比火燒一樣。

佢地望住我，好似諗緊點解我唔除低件皮入去換過第件咁。

我見唔對路就即刻跑走，上電梯果陣，見倒對面有三四個好似susie咁款嘅啊婆落緊去樓下，但佢地跟本唔係啊婆黎。

上到地面我想搵人幫手，但即刻諗起根本就冇「人」係度。依家果堆生物已經追上黎，我唯有即刻沿入黎果條路逃跑。

跑到一半天開始黑，而我亦跑到頭先個巴士站，衝入果條紅磚走廊。我一心急，就變左做舊石頭，跳上牆上逃跑。我偷睇倒地面有好多部機械人搵緊我。


然後我就醒左，訓左係床上面。一開眼，第一眼見倒嘅係部八達通機。

我放個銀包係上面，「do」一聲，我冇左兩舊水，再「do」就再扣錢。

完全唔知做乜。

然後我又醒左。

今次真係醒啦，附近冇八達通機，冇巴士站，更加冇細路仔。