一班高登巴打喺情人節，發起名為「14號英領事館拜年團」活動，話朝早10點半要去英國駐港領事館拜年。點知噚日記者準時去到，人影都唔見，等到11點至有一名疑似活動發起人（上圖），企喺領事館門口猛撳電話，之後就閃咗入領事館。呢位巴打事後話，入咗領事館交表，純粹路過，又寸其他甩底高登友係「鍵盤戰士」。
問到呢位巴打點稱呼？佢即刻快閃離開。另一名一邊拍低記者中伏情況，一邊喺高登貼文的巴打，原來一直企喺領事館對面馬路，話冇諗過咁多人甩底。據領事館保安講，領事吳若蘭目前唔喺香港，應該下周先返港，仲話一早收到風，知道網民會來拜年喎。

李八方