呢篇文一出, 應該會俾人圍屌, 皆因話題率涉超級沙文主義同埋種族主義。不過見有野噏咪噏吓咁。

真係利申一吓先 : 小妹有拍拖。男朋友係香港人, 土生土長。浸過幾年咸水, 都算有風度, 只係有時幼稚啲, 成撚日要去買模型。不過人無完美, 小小地咪哽左去。佢唔好返轉頭問我攞錢食飯就得。

佢唔知呢個專頁係我開。唔講太多, 費事穿崩。

然則小妹身邊嘅女性朋友當中, 係有同洋人拍拖嘅女子。

洋人好唔好啲, 我會話都係各花入各眼。小妹天生對鬼仔免疫。即係睇相覺得好得, 見到呀鬼仔嘅真人, 總係覺得麒麟怪, 周身唔自在。

洋人廣東話多數唔識講, 講到嘅又咬唔正。如果同我講普通話? 我會用「潮語」回佢「Pur Le More」,最憎人同我講普通話。英文? 返工都要講, 但係自問唔係好流利, 吓吓要諗, 始終唔係母語, 爭咁啲。佢地啲藍眼啡眼, 睇相好似水晶石咁.....好吸引, 但係真人對眼好淺色, 其實有啲恐怖, 好似啲彊屍片咁。我唔太敢直視。咁連直視都難, 又點可以嘴嘴呢。

之但係我啲「湊鬼」嘅朋友, 同慣鬼仔一齊就覺得好平常。所以人人鍾意嘅野唔同係自然定律, 各取所需。我同呢啲朋友都幾好姐妹, 其一係因為佢地一定唔會同我爭仔。

咁話說, 前排同幾個朋友出嚟飲野, 有人話個舊同學終於有拖拍, 仲係初戀。當大家知道佢男朋友係外國人之後, 男性嘅朋友講左好多.....好難聽嘅說話。

事實上, 呢個女仔真係唔啱香港男人嘅口味。佢身材比較豐滿, 皮膚偏黑, 厚嘴唇。佢以前暗戀過一個同學, 暗戀左兩年先敢表白, 個男仔話佢唔係佢杯茶, turn down咗。咁之後個女仔一直都好自卑。佢讀書好叻, 但係唔敢識男仔。依家佢搵到個審美觀唔一樣嘅外國人, 人哋一齊左, 班男仔唔係替佢開心, 而係話佢邊度夠大, 大件頭所以係大食吞得掂鬼佬之類。我好快咁飲完杯baileys就閃人, 真係唔想再聽呢啲八婆都唔講嘅是非。

一路坐巴士返屋企一路諗，我真係唔係好明，點解香港男仔咁憎女仔同洋人拍拖, 係憎到要殺死佢地嘅地步。

我唔係講近日哥單咩「港男扮鬼仔呃港女裸照」嘅柒文；亦唔係講蘭桂坊港女食洋腸飛港男事件。係個社會普遍接受港男去溝鬼妹, 而且溝到係好威嘅事, 但係港女鍾意外國人就係罪, 仲要係死罪, 人人得而誅之。諷刺嘅係, 明明我身邊都見到好多男仔話想識鬼妹。我望唔透...............港佬幾十歲去娶個二十歲嘅中國女人, 然後接晒個女人成村人落香港養埋佢地, 比起上黎可恨好多喎。唔解唔去群起屌鳩呢啲港男？

咁講開, 就攞嚟做例子。網上送裸照俾個三唔識七嘅人, 無論對方係咩人, 條女都係戇鳩, 你話我話嘅。呢啲相, 我連男朋友都唔會俾!!! 唔係信佢唔過, 而係經傳訊嘅野, 好易俾第三者偷。真人你睇飽佢囉。點解香港人咁失憶, 陳冠希電腦相過左好耐咩？ ( E? 原來都有7, 8年, 都幾耐....)
咁呢件事, 見人討論, 錯喺邊呢？啊! 原來錯喺個女仔鐘意外國人度。至於個港男講大話, 仲要偷人地嘅裸照公開呢, 就完全無問題。呢個真係咩事呢請問? 咁夠大把毒男同中國妹裸聊, 然後俾對方用毒男嘅裸照要脅俾錢, 咁對方完全無問題? 千古奇聞呀。呢啲就好似係有個女仔俾人強姦左, 你鬧佢著咁性感做咩咁。

老老實實, 如果唔係好似小妹咁「洋人免疫」, 你見到個烏克蘭金髮大眼娃娃話想識你，你心唔心動先？點解「鍾意洋人」係一個罪呢？你哋係義和團定伊斯蘭國？好多港男鍾意台妹㗎妹, 係咪又要去死晒去? 我個人好鼓勵港男娶鬼妹㗎妹, 好過你地把口話港女唔要港男有幾賤, 但係自己就去娶中國老婆!!! 有啲港男話「啲港女」侍住自己同鬼仔一齊就玩港男, 呢個仲好笑。你識幾多個港女係咁？而我想講最主要嘅係：

同洋人拍拖就一定唔愛香港？同洋人拍拖一定會恰自己人？你哋妄想被害症？

唔好咁樣啦!!!全世界都會以為港男好似你地呢班少數毒撚咁無自信!!! 你哋影衰晒香港男仔呀!!!

我其中一個同洋人拍拖嘅姊妹, 就係次次去旺角留守嘅時候陪我嘅其中一個。佢仲好有心機咁同佢啲外國朋友解釋香港發生緊咩事。
同前一篇文一樣, 我講過識到洋人/日本妹又點？唔係特別高級㗎, 唔係可以因而恰返自己人。另外就係唔好轉牛角尖, 係咁數臭自己人, 全世界都覺得香港人(無論男女)劣等, 咁先係最可怕嘅地方。

至於有啲毒撚話「我唔去中國搵老婆, 你入唔到我! 港女仆街就梗! 死晒去! 」﹣Well，咁我希望你咩都溝唔到, 買本如何打飛機過世啦。

https://www.facebook.com/hkgalshelp?fref=nf