成日見人講哩個字，膠登又有人話我現充

我睇wikipedia，現充：無需ACGN，單憑現實生活就能過得很充實的人

而根據我自身嘅觀察，喺膠登好似係「有拍拖＝現充」

但我完全唔認同哩個講法


好現實咁講，喺我地嘅社會中，生活得充唔充實，其實真係好睇經濟條件
冇錢嘅人，係好多野都做唔到；有錢人，追求各樣野都輕鬆得多

我生活有幾富足呢？
一家四口住好舊嘅公屋，一房一廳
我張床＝我嘅天地
無論係做功課、溫書、用電腦、瞓教、坐......我都係喺床上面
我D衫、褲、袋......甚至書、電腦，日間都喺擺喺床上面
夜晚瞓教？咪擺住落地下或者搵張櫈擺住先囉

識我嘅人都知我成日食垃圾
食荼記加$2轉凍飲都唔捨得
食譚仔都係自己拎個水樽出嚟擺擺喺枱面
你估我真係好鍾意成日食頹野架咩...

我最大嘅開支，都係用嚟買嚟裝身嘅
包括著嘅用嘅...

真心好老實咁講
望住你地屋企有工人、成千蚊買粒earphone、五六七千買電話、兩千蚊買張Display卡、幾千蚊買部console、大大個玻璃櫃擺模型玩具、有間貼哂lovelive海報嘅房、幾舊水去睇初音演唱會......etc
仲有好多我完全玩唔起嘅消費
你地仲話我哩種叫「現充」？
我真係好唔服

我仲係垃圾學生，都係靠做下parttime嚟賺少少零用錢
一個月都係幾千蚊咁

老老實實，我覺得你地先係真正嘅「現充」
仲要「現充」到離哂地，身在福中不知福嗰隻

Btw，唔好成日話人地有女朋友而你地冇
更加唔好話點解得唔到靚女嘅垂青
明明有咁好嘅經濟條件都唔好好珍惜
要企出嚟乾乾淨淨企企理理醒醒目目有幾難姐？
人地行連卡佛嘅消費分分鐘少過你行一日黃金呀

其實你地成日話女仔大洗都係差唔多
點解行出中環行出尖沙嘴銅鑼灣，會有又靚又識打扮嘅靚女？
因為佢地係現充？
人地買支chanel唇膏平過你張初音未來演唱會門票啦
話女仔要打扮=大洗，真係笑而不語

唔好Get錯，唔係踐踏邊個嘅興趣/嗜好
唔係叫你將買玩具嘅錢拎起打扮做MK溝女
更加唔係叫你地唔好睇初音，拎去睇張敬軒演唱會
而係想同你地講
每個人都有自己嘅取捨，食得鹹魚就要抵得渴
唔好單睇「自己冇女，人地有女」，就講成係人地生活好美好，而自己生活就好慘咁
咁唔爭氣咁無恥都有嘅

自己有buffet食唔去拎雪糕，掉轉頭話人地喺街度食雀巢雪糕係「現充」？
我真係睇唔透

成屋lovelive野、有工人、幾款遊戲機、有得成日upgrade電腦都唔叫「現充」
反而我先係「現充」？
咁我諗，你地每個人都有得做「現充」