是咁的，大家細個個時一定有玩過鬥獸棋
亦都因此知道動物界入面每樣物種都有佢既天敵
例如象怕老鼠，老鼠怕貓等等
而天敵既形成不外乎就係Ａ長期唔夠Ｂ揪
久而久之就開始潛意識對Ｂ淆底
但係點解唯獨蚊依樣經常被人類撲殺既生物偏偏就唔怕人類呢？
至此我就開始進行研究，翻查大量資料
終於比我發現
長久以來人類已經習慣左用外物例如殺蟲水、電蚊拍等等治標既方法去殺蚊
忽視左身體既鍛練，輕視肉體既力量
令到Ｄ蚊唔再怕手無寸鐵既人類
所以我由五年前開始就瘋狂鍛練自己既肉體
直到前幾個月，終於大成
我Ｄ肌肉係個一刻已經可以稱得上係完美
肌肉爆硼既我，除左可以一拳一個孱仔之外
仲可以完美捕捉到蚊既飛行軌跡再進行防守同反擊
而為左証明我既理論
依幾個月既時間我已經走訪左新界各區既污水廢物匯聚之處
每到一個地方，我都會學似孝子吳猛咁打大赤肋吸引D蚊埋黎
一般黎講，當蚊出現係我２米範圍內就會比我強而有力既胸震力場震至破肚而死
但係力場總會有死角位比蚊承虛而入
但我都會係佢針我個一刻用肌肉將佢鎖死
任何既蚊都傷唔到我分毫之餘，仲逃不出我半招之內
之不過我剿蚊既過程中，我都會放過兩三隻蚊
原因唔係因為我仁慈
而係我知道要治本，就要由根源做起
個Ｄ我放過既蚊一定會即刻同佢Ｄ姨媽姑姐講人類既可怕之處
以蚊依種腦容量極細既生物黎講
佢地一聽到即刻就會信之餘仲會嚇到瀨屎瀨尿
係依種情況之下，怕人類既潛意識自然會出現
而蚊既繁殖期係極多同極快
依種怕人類既潛意識就會植入到班卵到
再一代傳一代直到所有蚊都怕人類
到左依家，我身周已經有一個半徑５００米既無蚊帶
由此可見，我既理論係成立既
但係單靠我既力量要令到全世界既蚊都怕人係唔會成事
所以我係今日就開始秘密招募左一班黎至世界各地既大隻仔做我爪牙
訓練佢地如何治本滅蚊，務求令到全世界既人都唔洗比蚊針
將來如果大家係街上面見到赤裸上半身既大隻仔亦都唔需要大驚小怪
最後
眾所周知，比蚊針係件好令人煩厭既事
往往會令人脾氣暴燥而做出種種錯事
依種蝴蝶效應絕對唔可以睇小
輕則家暴，重則連戰爭爆發都可能會發生
而我依家做緊既野絕對係會令世界達至更和平
所以我頭先已經去信左諾貝爾委員會申請諾貝爾和平獎
希望可以成為香港第一個諾貝爾和平獎得主，為港爭光
多謝大家支持