最近黎天王出席某名錶活動時，手戴限量版手錶嘅佢，喺台上被問到對該手表嘅感覺？佢頓又拋出1句金句：「冇感覺，因為太輕，輕過膠表，所以感覺無嘢。」
其實黎天王金句處處，有時除咗夠無厘頭外，其實有啲都發人深省嘅，以下筆者節錄咗20個金句，啱使嘅就袋住佢啦！

text – Joel


「無厘頭篇」

1. 衞蘭肥過部電單車
（原文：我唔會鼓勵話鍾意佢肥，但亦從來沒有嫌棄過佢肥。作為朋友，喺適當時候，我會婉轉地同佢說，正如有次我同她合作拍個綿羊仔廣告，當時佢肥過部綿羊仔，咁點同客人交代，所以我就話佢：『你體型肥過部綿羊仔。』佢一聽就明。」

2.如果俾我製造浪漫，我想有1個魔法，可以變走晒啲記者。

3.我豁達，所以我唔介意別人話我唔豁達。

4.我喺英國讀書時，試過有同學俾支大麻我，我唔要，因為啲錢係爸爸供我讀書嘅，我覺得就算真係要食嘅話，都等將來賺到錢先買。（禁毒活動時台上的發言）

5.有法例之前，都試過醉駕，我飲咗酒揸車叻過平時。

6. 攝影記者就好似我爸爸，文字記者就係媽媽，成日催我幾時生，反而真正嘅父母就冇問過，呢啲自然嘅嘢，自然流程有就會有。

7.其實當年我去英國讀書已經係咁，呢個係我嘅習慣，如果魚柳包裏面嘅魚柳變咗就唔係魚柳包。(被問到髮型長期不變）

8.最近好多豬流感，創作就係咁，係要有靈感。

9.核心嘅外圍係核心嘅內圍

10.我唔可以空肚食早餐



「發人深省篇」


1. 男人，醜，冇罪，冇才華先有罪。有外表、又有才華，重要保持自己嘅上進心，累積實力，先能保持男人嘅身價。

2.每個人命裏都有贏有輸，無論贏得漂亮、輸得漂亮都係好好嘅經驗。最緊要心夠堅定，相信自己可以完完整整行完自己要行嘅路，咁就得啦！

3.好多事情可遇不可求，通常有目的有意識去做都唔會成功，反而隨意去做可能有意外之喜。

4.男人嘅魅力來自工作，男人一旦退休離開工作，就已經喪失魅力。

5.所有嘅美德都可以偽裝，只有修養係內在的。

6.你贏不了，但也不能輸到底。

7.導演搵我演戲，我總不能話：「導演，我要做李小龍」，但我可以做好黎明，咁樣就足夠了。

8.唔好理人哋點睇，反正無論你係好人定賤人，都會有人覺得你係賤人。

9.信心應該放在自己心裏，不應經常掛在口邊。（被問自己有冇信心獲獎）

10.愛情似香檳，開始時有好多汽，飲後會high。


http://www.nmplus.hk/home/黎明-10大金句/2/