http://news.mingpao.com/pns/「非讀港大不可」 港家長唔畀阿女內地升學/web_tc/article/20150416/s00002/1429119781866

【明報專訊】內地免試招生上月截止報名，7月中公布結果。中國教育留學交流（香港）中心總經理鞏萬噚日同傳媒茶敘時講起，上月招生時遇到個別「非常家長」，有個女學生兩次到中心報名，但最終畀尾隨嘅家長阻止，仲沒收埋回鄉證，話個女「非讀港大不可」，擔心佢如果有內地升學呢個「保險」，就唔會認真應考文憑試，最後搞到個女喺中心度喊，認真尷尬。

另外，有個家長幫個仔報某間內地大學專科，收生要求講明中學要讀化學科，嗰名學生高中無讀化學，但經提醒後，個家長仍堅持個仔讀呢科，鞏萬話擔心同學如獲錄取，上堂難以跟上進度。

中心同時公布今年本地學生報名人數，網上報名有3468人，最終近3000人到中心確認報名，人數比去年下跌，而最多學生選報為第一志願嘅大學，依次為中山大學、暨南大學同廣州中醫藥大學。

鞏萬認為，報名人數減少，主因係應屆文憑試考生較去年少約5000人，加上內地免試招生已推行第四年，估計申請者已對計劃認識加深，盲目報名嘅申請個案減少。