■馬恩國認為西方民主國家也有篩選。易仰民攝

【人物專訪】
倡設反港獨法卻被政府甚至黨友潑冷水，民建聯大狀馬恩國接受本報訪問時強調，無市場及無逼切性不等於無立法需要，反問「一年香港有幾多單謀殺罪？」力指要防患未然。他強調港獨議題對中央是痛處，指陳雲被封港獨之父「當之無愧」，認為立法是為香港設「硬底線」，比中央推出令港人難接受的政策好。
記者：陳雪玲　許偉賢

特首梁振英說沒計劃立反港獨法、民建聯創黨主席曾鈺成更稱「不代表民建聯」。曾以中澳法學交流基金會主席帶團訪京談港獨法的馬恩國坦言，是否需要立法要看從那個集團利益出發，指民建聯要考慮選舉因素，自難以支持，但對中央卻是有需要，形容港獨議題是中央的痛處，「領導人寧願輸經濟，政府都唔會輸呢樣，港獨係中央無時無刻最重視嘅議題」。


陳雲

倡立法防中央出手
不少評論指港獨是偽命題，難成氣候，馬卻以嶺南大學中文系助理教授陳雲著書立說倡港獨作例子，「佢（陳雲）冇put into action，但有人將佢講啲嘢put into action」，可見有港獨思想出現，更說陳雲被指「港獨之父」當之無愧。本報曾致電陳雲查詢對反港獨法的看法，但陳聽罷即掛線，未有回覆。他其後在facebook指《蘋果》誣衊城邦論，應該「落地獄」。
馬恩國以謀殺罪為例指，「一年香港有幾多單謀殺？唔係好多……咁冇逼切性，（難道說）我唔需要立呢條法？」強調立法並非視乎逼切性，有時更需要的是前瞻性；若情況發展至要中央「出手」，「會有更多政策令香港人好難接受」，舉例如要求特區政府在18區撥地駐軍，「我只係要個地方、唔使派人，你哋都驚啦……立法反而有諮詢過程，可以畀大家討論。」
談及政改，馬恩國指港人怕共產黨，是否願接受共產黨統治是關鍵，指港人受西方思維影響，認定外國聯邦制才是普選，「我哋點可以將西方制度硬插入香港？你要改變即係搞政變，改《基本法》將香港變成完全自治，喺呢方面呢，（將）特首委任方面變成完全自治，你要自己特首自己揀、咪完全自治，咪係港獨一部份」。
馬恩國並指要提委過半支持出閘是任命權的延伸：「民主就係一人一票加有篩選嘅出閘」，反問哪個西方國家在出閘時沒有篩選，「你話冇篩選嘅民主先叫民主，全世界都冇」。

馬恩國語錄
談港獨：
「（陳雲）出咗兩本書講港獨，（港獨之父）佢當之無愧，佢冇put into action，但有人將佢講啲嘢put into action。」
講政改：
「民主就係一人一票加有篩選嘅出閘。」
為岳飛論解畫：
「我唔係衝動（以岳飛自比），係有諗過。我要我國家強大、保家衞國，不如講歷史人物，大家都識。」
論粗口文化：
「你同朋友講粗口可以接受，同媽媽講就唔可以接受，要睇對象；?家啲人可以犯法表達訴求，講粗口其實都算mild。」

http://hk.apple.nextmedia.com/news/art/20150512/19144553