【本報訊】工聯會立法會議員陳婉嫻早前開記者會為懷仔爭取居港權，不諱言是要向入境處施壓。嫻姐踩界做法，令自己成眾矢之的。據了解，今次懷仔自願遣返，放棄爭取酌情留港，都是受嫻姐高調處理，令當局被迫「揸正」執法所累。嫻姐昨卻卸膊稱：「所有嘢都係婆婆決定」。懷仔婆婆周紹璇昨晚在羅湖表示好後悔向陳婉嫻求助。
高調處理所累
陳婉嫻早前承認，公開懷仔身份做法踩界，目的是要向入境處施壓，加快處理事件。她否認「攞彩」，強調只是想幫懷仔融入社會，並非為自己謀取利益。陳婉嫻當日高調陪懷仔到學校及入境處，昨日懷仔到入境處接受遣返，嫻姐卻未有現身陪伴，只在立法會回應稱，不清楚懷仔為何改變主意。她強調所有事都是懷仔外婆的決定，「所有嘢都係婆婆決定，由當日至?家嘅情況，都係佢決定，我哋只係一個（協助）過程……我尊重婆婆嘅決定。」
據悉，今次懷仔自願遣返，是受陳婉嫻高調處理所累，「嫻姐高調開記者會，開晒名，社會又咁大反響，當局唔可以唔揸正嚟做，如果酌情處理懷仔，一定激發社會不滿，當局唔會冒呢個風險。」有協助其他無證童的團體亦透露，「自有示威者到願意接受懷仔入學嘅學校示威後，唔少原本願意接受無證童入學嘅學校都打退堂鼓，今次真係俾嫻姐累死。」
有政界人士指陳婉嫻今次「攞彩」不成反惹禍上身，因臨近區議會及明年立法會選舉，「雖然話工聯會多鐵票，但事件已打擊嫻姐同工聯會形象，對選情有影響。」工聯會黃國健昨替黨友陳婉嫻說好話，認為議員接到求助好難不幫手。
■記者謝明明、陳雪玲

http://hk.apple.nextmedia.com/news/art/20150605/19172978