New Monday
http://www.nmplus.hk/home/侏羅紀世界睇完呢10點清楚晒/

《侏羅紀世界》十不解．釋，睇完呢10點清楚晒！

1993年由史提芬史匹堡（Steven Spielberg）打造嘅《侏羅紀公園》（Jurassic Park）系列，係帶俾觀眾前所未有觀能激感嘅科幻電影，前兩集票房嘅成功奠定其電影定位，可惜01年換血再拍嘅第3集，因成績大不如前嘅關係，其系列就此止步。 相隔14年，史匹堡轉做監製，搵嚟新導演哥連卓法羅、《銀河守護隊》上位型男基斯柏特同金球獎提名女星拜絲黛麗侯活（《寫出友共鳴》），打造出21世紀嘅《侏羅紀世界》！話晒係進化版侏羅紀，以下呢10點，喺入場前睇咗先，對你了解一定有幫助！

text-aMan (ig:[#0000FF]amanachiu[/#0000FF])(https://instagram.com/amanachiu/)


延續第1集
雖然《侏羅紀公園》系列拍咗3集，但《侏羅紀世界》選擇將故事設定喺第1集嘅20年後，講述原本荒廢嘅侏羅紀公園又再次營業，園內設備全面升級，有攤位、有高科技玩意、有得玩騎恐龍等等，同舊作有強烈對比。


4隻關鍵恐龍
戲中講到基斯柏特主力訓練4隻初生恐龍，除咗表達出恐龍有人性，可以接受訓練之外，佢哋喺最後危急關頭亦有極大作用，所以都有角色名，分別係：Blue、Charie、Delta、Edho。
題外話，問到基斯柏特係點分佢哋時，佢笑言：「我哋拍攝嗰時，呢4隻恐龍係人扮，點會唔認得邊個打邊個？哈哈！」咁咪同海洋公園嘅熊貓一樣？講笑啫！


點解I-Rex咁勁
I-Rex係隻有極高智力嘅恐龍，更令公園陷入大混亂。有幾高智慧？點解咁高智慧？因為I-Rex以多種動物嘅基因如黑魚、樹蛙、蛇、多種恐龍等等，好似因為佢有黑魚嘅基因，識得令自己冷凍，逼開熱能探測器而逃走；又可以似樹蛙咁識變色，咁而家你知點解咁多人都搞佢唔掂啦！


博士會出現
電影特登搵番首集飾演關鍵人物——吳亨利博士（Henry Wu）嘅黃榮亮（BD Wong）繼續研究恐龍；戲中會出現20年前侏羅紀公園出現過嘅車、用具、已荒廢嘅地方等等，fans應該睇得勁興奮。


誰是終極大佬?
雖然話I-Rex勁到無得輸.com，咁最後係點解決嘅呢？（劇透）到最尾搵嚟同樣係暴龍嘅T Rex（第1集嗰隻呢！樣就係，不過冇正式講過就係22年嘅嗰隻）出嚟以暴易暴，但都未完，就係千鈞一髮之間……再出現另一隻恐龍出嚟幫拖，至於係咩，留番俾大家入場睇吧啦！


當獅子咁訓練
戲中飾演恐龍馴獸師嘅基斯，自爆係點學訓練恐龍，佢話：「劇組請咗馴獸師，我跟佢哋學點樣馴服獅子及老虎等危險動物，因為我相信感覺跟馴服恐龍相似，所以就用番呢套！」


女人話事
早前有唔少荷里活女演員指電影圈中有男女不平等嘅情況出現，所以拜絲黛麗侯活喺訪時直言：「唔止電影圈，好多其他工作女性待遇都冇男性咁好，所以導演將Claire寫成係專業女性，邊個話女人唔做得ceo、做管理層？」


細佬有來頭
電影中除咗男女主角，飾演拜絲黛麗侯活嘅兩位姪兒小演員都值得留意，除咗因為戲分重之外，演技又唔會被比下去，特別係弟弟泰辛普金斯（Ty Simpkins，左），原來佢係《兒凶》嗰個天才童星，亦係《鐵甲奇俠》中喺木屋救過Iron Man一命嘅細路……年紀輕輕有咁多經驗同代表作，難怪咁好戲。


識揀一定係3D
先引述導演哥連所講：「《侏羅紀世界》想帶俾觀眾嘅係恐懼，我打造咗隻新嘅基因混種恐龍，非常兇猛，喺3D技術支援下同真嘅一樣。電影嘅3D效果採用咗動作捕捉技術嚟拍攝，大家坐喺戲院，會感覺恐龍就喺面前。講真，如果『唔驚』嘅話，《侏》有咩意思？雖然某啲地區都有2D版揀，但我強烈推介同建議大家，一定要睇3D！」筆者睇嘅都係3D版，的確有被震撼到，難怪哥連咁有信心。


續集應該有
前作都拍咗3集，咁《侏羅紀世界》會唔會一路拍落去？導演哥連話：「我估計應該會有，公司好似係打算緊籌備下集。（你會唔會繼續執導？）我未有呢個通知，不過作為觀眾，當然都好想再有套好勁嘅系列電影出現！」

https://www.youtube.com/watch?v=U_vpJyuPsYU