俾人睇吓都好,好過自己亂諗...

你有無夢想?我冇,我好實際!畀我最接受到嘅最不切實際嘅嘢叫做理想...我做唔到,因為我被迫要享受嗰種自卑,妒忌,挫敗感。
打從步入社會嘅第一刻,所有學校畀我矜持嘅夢,一切自信都流走哂。你未必係我,但已入世嘅你一定經歷過...
自此,我墮落係必然嘅事,但只係小事,因為你睇唔出。聼我講：「衰!我唔會做最折墮嗰個；好!我會畀到你假希望」
墮落都有中庸之道,而呢種,就係最無得救嘅一類。縱使係咁,但實際上我喺度炫耀緊自己嘅病態,所以今次唔需要畀相應同情去「獎勵」我,亦無必要幼稚咁斥責我。

做一個普通人！呢個就係我畀自己最大嘅報復,每日返工,放工,衣,食,住,行,做一個普通人...我要成為浪費嘅人,去傷害識得珍惜嘅我。
日日都做重覆嘅事,去維持生命,同時浪費生命。拒絕去實行自己想做嘅嘢,20,30,40...一直到老,一直到死。
生命從來未係我入世後再有流動過,只係不斷重覆嘅一日,到死嗰日都係。
點解我要咁做?因為個個都係咁做,只係諗法有啲唔同,所以我唔係異類,同伴亦出奇地多,我咁做亦無咩原因。
從眾!永遠都係保護自己嘅最好方法,君子不近危,自問咁多年嘅比較中,都搵唔到自己出色之處,憑咩做異類?

天道或者酬勤,但點解想懶吓嘅人,連天都唔幫呢?老人院一班老人,唔敢話佢有貢獻,但做人做咗大半生,總比自殺嘅人嚟得努力。
但老嚟無力再去辛勤工作,落得喺一班老人痴呆,插喉,無朝氣,好似等死嘅集中營嘅下場。
連子女都甚少問津,更何況其他人?人人都會老,根本就係惡性循環!公平?一啲都唔公平!個天對擁有豐富感情嘅人類嚟講一啲都唔公平!對無用嘅人都會視若無睹!

我身邊嘅人包括:我祖父母,外祖父母,父母,甚至我自己都經歷緊以上我講緊嘅事。
「做一個普通人！」,唔好傻啦!諗嘢長遠啲,你就知呢個計劃帶畀自己嘅只有後悔。
快啲換過個諗法,或者你依家再從新行嘅每一步,都可能影響到你連同你家人下半生有更好嘅目標同去向！

祝各位及各位嘅親人身體健康,晚境幸福