出賣高登是誤解
林祖舜續稱：「我做平台啫，唔係決定你啲嘢啱唔啱，一講到法律其實應該搵法官」，他笑言至少港人仍相信，本港司法制度是公正。他又否認與入稟人早有協議，「如果係，唔使經個官啦，擺喺枱底咪得囉，仲要俾媒體睇住我哋，冇理由咁戇居」。對於今次交出網民資料引起極大迴響，林祖舜相信是他們在庭上一句話，令網民產生誤解，「法官會問有人申請你反唔反對，我哋個立場係唔會支持佢呢個申請，咁網民會有個mindset，唔反對即係支持，佢會用常理諗，點都要反對先啱！」不過，他相信不論最終結果如何，「界線一定更清楚，討論區邊啲嘢講得，邊啲嘢係唔講得，係咪仲係咁勇呢」。
作為高登最高話事人，林祖舜手握30萬會籍的生殺大權，但他笑稱自己非網民想像般「小器」，強調每次「BAN人」均是有根有據。他又指，高登面對愈來愈多的網絡打手進駐，「我哋發現某啲言論係網絡打手造成，即係話唔係真嘢，明明係得3個人，扮到30個人講嘢……做得最差係一入嚟登記，乜都冇講就去宣傳一啲嘢，可以係商品，可以係理念，咩都有，你唔係一個討論者，係一個宣傳者」。他不諱言高登最「亂」就是「時事台」，但認為這正正是社會縮影，「政府想知民情唔使搞咁多嘢，上高登就得啦」。
左中右打手一律照BAN
針對網絡打手，林祖舜透露高登有一個專門系統識別他們，「睇IP係其中一樣，仲有睇登記時間，同埋參與討論嘅關聯性等等，背後仲有一招撒手鐧，就係睇啲IT數據！」道高一尺，魔高一丈，林祖舜指網絡打手偽裝功夫愈來愈好，加上高登反管理員情緒較高，易招致「打壓」指控，惟他強調不論網絡打手來自左、中、右陣營，均一視同仁——逐出高登，大前提是先調查清楚，免錯殺無辜。
談到「佔中」這個社會熱話，林祖舜坦言若有執法機關上門要求索取網民資料，他堅持不會即時交出，「條線一樣，交去法庭處理」。不過，他強調政府目前無向高登施壓，「如果真係有一日，佔中喎，(有人要高登)delete個post、擺低啲、收埋佢唔好俾人睇，或者有人使橫手要我哋配合，咁就要出聲喇，等大家成個社會都知，有啲人士做緊啲嘢打壓我哋」。(相關新聞見A.4)