http://hk.apple.nextmedia.com/enews/realtime/20150708/53945541



冰封三尺，非一日之寒，大台新聞部主播張文采甘願為七線藝人羅鈞滿，不嫌不棄等足對方4年，又點會冇愛過!（新聞連結：http://bit.ly/1CXrIyP）

張文采日前喺網上宣佈同拍拖4年嘅羅鈞滿分手，更寫道:「依家我重生喇！」又指自己浪費咗4年時間，證明對呢段情真係毫不留戀，有傳二人分手，係因為羅鈞滿早前被影到偷嗒長髮空姐，因而遭張文采狠撇，羅鈞滿昨日喺大台被問分手一事佢就話唔覺得浪費時間。

今日有周刊爆，實情係因為羅鈞滿早前偷食索空姐，又喺韓國醉酒鬧事，得罪江湖大佬，先令女友張文采心都淡埋，據知情者表示，羅鈞滿喺今年一月曾瞞住女友張文采，同索空姐Sylvia一齊去過韓國玩，跟手到二月，羅鈞滿知對方會去韓國，佢就飛去當地搵Sylvia，奇就奇在羅鈞滿冇同Sylvia一齊返港，竟然留咗喺當地繼續玩。

報道又指，有一晚仲同朋友去咗飲酒，未知係唔係幾杯落肚，玩到癲晒，竟然撩當地江湖大佬嘅女友，被要求賠錢道歉，江湖大佬仲話如果羅鈞滿唔賠錢，就告發佢影女人裙底，有傳佢都想私下畀錢就算。

據知羅鈞滿係校長譚詠麟帶入明星足球隊，一直同足球隊啲大哥輩有偈傾，佢都有致電返香港求救，不過都係籌唔夠錢，最終上埋當地警局，要余詠珊派律師去救佢，羅鈞滿喺當地被扣留咗兩個月先可以走人，今年四月底返港，而喺四月中仍身在韓國嘅羅鈞滿，就喺微博po出笑匠差利嘅相，留言表示：「Nothing is permanent in this wicked world, not even our trouble.」形容喺邪惡世界入面，麻煩事唔會長久，似乎講自己嘅處境。

據聞，女友張文采都唔係即刻知呢件事，羅鈞滿都冇交代清楚件事，直到近排羅鈞滿被爆偷食，張文采先知道真相，狠心斬纜!