故事係真人真事改篇
改自我朋友嘅故事

小弟第一次寫故仔，好多野唔識
唔好睇就唔再寫，有人睇我先繼續落去

－－－－－－－－－－－－－－－－－－－－－－－－－－－－－－－－－－－－－－－－－－－－－－－－－－－－
「嗰陣我真係幾嬲呀，我去到親眼望住佢開咗張檯攬住幾條女，我咪過去打佢囉，佢竟然仲還手喎，之後我地打到成張檯啲杯都爛哂。」

喺一間寫字樓，幾個靚女OL圍埋傾緊計。

「Carman 你同你男朋友真係好得意呀！」

「哈哈～」全場一陣笑聲。

「有乜咁得意姐，佢戇鳩架。」

「係喎 Tracy，我地未見過你男朋友喎，你男朋友點樣架？」

「Huh？冇乜特別呀，佢唔會點出去玩嘅。」Tracy 面上露出少少尷尬嘅神情。

「有冇相俾我地睇下呀？」

「冇呀，佢都唔鍾意影相嘅．」

「收收埋埋咁喎Tracy。」

「我走先喇，男朋友今日順路嚟車我。」Christina 一邊補妝一邊講。

「Bye Tina，我今晚應該仲有排O呀。」
－－－－－－－－－－－－－－－－－－－－－－－－－－－－－－－－－－－－－－－－－－－－

Tracy（同真人相似）
－－－－－－－－－－－－－－－－－－－－－－－－－－－－－－－－－－－－－－－－－－－－
Francis 喺宿舍，瞓喺床度，望住電腦，喺櫃桶拎咗隻儲存咗200套電影嘅外置Harddisk出嚟，Plug落面前嘅Laptop度。

「有冇啲唔使用腦架，好攰呀。睇 Daredevil 啦。Man without fear！」Francis 一路揀戲，一路自言自語。

「登登登登登登～登登登～」Francis 知道女朋友 Tracy 終於放工。

「喂，你放工嗱～」Francis 拎起電話，一路行出門口一路接電話。

「係呀，今日真係超忙囉，差唔多六點嗰陣，日本嗰邊山田先生先打嚟話有份野今日之內要，我超肚餓呀。」

「係喎，原來已經9點幾，快啲返去食飯啦。我今晚同聽晚都有功課 deadline 呀，好攰。」

「唉～你唔使返工仲好意思同我講哩啲，我日日返工都好多野交添。讀大學已經係最輕鬆最得閒架喇，你依家仲要冇返工，你要好好珍惜哩段時間呀，畢業之後唔會有咁嘅日子㗎喇。」

「我知㗎喇～」

「今日 Alice 又叫我教 Jessie 用新嗰個 system 做野吖嘛，跟住發現原來成個 team 得我識用，連 Lenna 都讚我好勁。」

「係喇係喇。」

「不過其實只係因為成個 Team 得我一個又去學過姐，佢地個個都咁叻，有去聽嘅一定識啦。我覺得佢地個個都好勁囉！唉～全部又叻又靚女，我幾時先會有佢地咁叻呀？」

「你遲啲就會好似佢地咁叻㗎喇。」

Deadair 兩秒。

「喂喂，聽唔聽到？你等等，啱啱有野想同你講，俾我諗諗先，唔記得咗～」

Francis 合埋眼思考咗兩秒。

「算啦，唔記得咗添」

又再靜咗兩秒。

「係呢～今朝返工有冇搭的士呀？」

「冇喎，今朝趕得切。」

「係呀～咁...咁你中午食咗啲咩呀？」

「咪平時食嗰啲，講咗你都唔識又冇反應㗎啦。」Tracy 開始覺得有啲唔耐煩。

「咁好囉...ehhh... 」

「係咪冇野講喇？咁收線啦～」

「唔係呀～ehhh...你係咪想食上海野呀，我地哩個禮拜去食啦～」

「你都食唔起。」

「我已經日日有 send CV 出去㗎喇...」

「你有冇反省過點解冇人請你呀？」

「我 working experience 咁少...」

「唔關事囉，根本你個人就有問題，講野又奇怪，人地同你講野你都唔認真應，跟住又講埋啲勁悶勁HEA嘅野。唉～我覺得其實你將來搵full time都會係咁囉，咁樣你點做到有錢人呀，我話過我淨係會嫁俾有錢人囉。」

Francis 深深咁呼咗一啖氣。

「你信我啦，我會搵到錢養你㗎。」

「我真係覺得你唔會囉，我真係好想飛咗你，唔想成日同你一齊好似可憐緊你咁，等你搵到工先嚟搵我啦。」

講完哩句，Tracy 就收咗線。

Francis 嘗試打返轉頭，但 Tracy 都唔肯聽電話。之後 Francis 再用 Whatsapp 搵佢，都係已讀不回。

Francis 一臉呆滯咁企咗喺度，眼角隱約滲咗少少淚水出嚟。佢慢慢行入廁所，然後望住鏡入面嘅自己，雙眼無神、皮膚又冇好好護理、髮型又求其；再諗諗自己各方面嘅條件，只係公屋長大嘅頹廢學生，點睇都唔似會發達；再諗諗比自己細一年嘅 Tracy，Model級嘅樣貌身材，又自己搵到錢，隨手都可以識到幾個靚仔太子仔，自己又點會襯得起。

傷心嘅Francis返入房，打開電腦，打算上討論區開個帖，將所有唔開心嘅事講哂出嚟。但當佢打完準備發表之前，佢意識到自己正做緊非常廢柴嘅事，就直接閂咗個Browser。

之後，佢搵返自己嘅文件夾，搵齊哂證件相同埋學歷證明，準備第二日出去搵工。佢將啲野整理好哂，擺定喺檯面，然後繼續趕功課。

－－－－－－－－－－－－－－－－－－－－－－－－－－－－－－－－－－－－－－－－－－－－

過咗一星期，Francis 依然未搵到工，而 Tracy 一直都係已讀不回。Francis 拎住電話，由窗口望向遠方嘅天空，好似諗到啲野。

佢打開銀包，拎咗個一蚊銀出嚟，一拋一接，手掌上嘅硬幣見到個「1」字。

佢望住個銀仔，嘆咗一口氣，然後將個銀仔由窗口掉咗落街。