New Monday
http://www.nmplus.hk/home/為　美國隊長-3鋪路，咪睇小-蟻俠-ant-man-，呢10點你要知/

為美國隊長 3鋪路，咪睇小 蟻俠 ANT MAN ，呢10點你要知！

或者《蟻俠》 ANT MAN 唔會係Marvel入面最受歡迎嘅主角人物，但始終都係Marvel出品，就算套戲noise唔算好大，追開嘅fans依舊會睇！今次扮演「蟻俠」嘅係擅演喜劇嘅保羅活特 （Paul Rudd，《弊傢伙⋯搞大咗》），講述本身係職業騙徒嘅保羅，為咗家人決心洗心革面，其偷嘢嘅高超技巧同身手，被皮漢克博士（米高德格拉斯）睇中，着上蟻俠戰衣，解決一個驚天大陰謀……劇情全部都估到，不過有件事你唔入場睇到尾真係唔知，就係蟻俠會加入美國隊長等人嘅復仇者聯盟，其實今集《 蟻俠 》有個重要任務，就係為《 美國隊長 3》鋪路！
text-aMan（ig：[#0000FF]amanachiu[/#0000FF]）(https://instagram.com/amanachiu/)


1.為《美國隊長3》鋪路

慎睇！以下文字有嚴重劇透。直接啲咁講，基本上《蟻俠》嘅出現，只係為《美國隊長3》鋪路，所以電影中會經常提到神盾局，而飛隼（安東尼麥奇，Anthony Mackie）亦有客串演出（重會同蟻俠交手），片尾亦會出現美國隊長同寒冬戰士（施巴斯坦史丹，Sebastian Stan）而留下蟻俠將會正式加入復仇者聯盟嘅伏線……大膽講1句，《美國隊長3》會帶俾大家嘅驚喜唔止咁少，盡情期待吧！


2.皮漢克博士係神盾局出身

被喻為Marvel世界中其中1個最具才智嘅角色，亦係「復仇者聯盟」始創成員之一嘅皮漢克博士，身為科學家，掌握瞬間縮細技術，以及操控螞蟻兵團嘅能力，令佢成為神盾局重要一員，以秘密特務「蟻俠」身份效力，不過經歷一次慘痛收場嘅任務後，漢利彭博士決定把瞬間縮細技術嘅機密永久埋藏。


3.點解揀史葛凌？

保羅活特飾演嘅史葛凌，係智慧型職業騙徒，專長高科技爆破神偷技術，本質卻係好人一個，出獄後更決心做個好爸爸，好好照顧女兒。表面上毫無典型超級英雄特質，不過史葛凌卻憑住敏捷身手，又係高科技達人，所以成為漢利彭博士心目中「蟻俠」嘅最佳人選。


4.本為復仇者聯盟始創成員

因為《銀河守護隊》嘅成功，亦令電影公司覺得觀眾係妃絕對接受新角色嘅出現，既然搵到食，所以繼《銀》之後，再推《蟻俠》出嚟吸金，而且蟻俠本身係復仇者聯盟嘅始創成員，其實成件事都好合理。


5.今集反派係邊位？

由漢利彭博士悉心栽培嘅徒弟戴倫高斯（哥里史托），跟隨佢喺彭氏科技學習，勁有野心嘅佢，一心要搵出漢利彭博士瞬間縮細技術嘅機密，打造成軍隊嚟賺取暴利，喺一連串危險實驗下，戴倫高斯改良漢利彭博士所發明啂戰衣，以更高科技化同更現代化，稱之為「黃蜂戰衣」！最後更由自己着上黃蜂戰衣同蟻俠對戰。


6.女蟻俠現身？

成套戲都有一路為漢利彭博士嘅女兒——可兒（伊雲祖蓮莉莉）鋪路，講佢遺傳父親嘅聰明才智、勇敢，更練得一身好武功，成為了出色嘅策略家，佢更一路爭取由自己成為蟻俠嘅想法，可惜一直被博士拒絕，不過電影去到最尾，原來博士己為佢準備好一套女蟻俠戰衣……


7.「彭氏粒子」，Iron Man都想搶

由漢利彭博士發明嘅彭氏粒子，亦係蟻俠戰衣嘅主要技術，蟻俠戰衣可以話係Marvel電影宇宙中最勁嘅一套英雄戰衣，因為彭氏粒子可以將人體瞬間縮細，卻同時可以引爆強大能量，所以當時重喺神盾局嘅博士，彭氏粒子都多次被Iron Man搶奪，想話用嚟製造武器，最後博士寧願將技術埋藏於心底。


8.戰衣有幾勁？

我唔係指戰衣可以縮細個種勁，而係為咗電影，真正打造出嚟個套！真實中嘅戰衣同樣滿佈線路、小燈等數百件零件，LED小燈數目更多達159盞（方便戰衣唔同部份可隨時發光），又特別喺入面加上冰墊同背部加設水管散熱，令保羅活特唔使熱死。 講開又講，其實為咗配合拍攝，服裝人員最終製造咗13套戰衣、17個頭盔、17條腰帶、8對手套、15個背包、6對鞋同15個頭套！


9.點控制螞蟻？

漢利彭博士、可兒同蟻俠都可以控制蟻群嚟幫助自己，到底佢哋點同蟻溝通？就係電子頭盔（博士用嘅則係個細到好似助聽器咁樣），而頭盔內加設電線、小燈等零件，每個頭盔由超過60件組件組成，包括10盞LED小燈，呢啲雖然大家睇唔到，不過唔等於製造團隊唔會做！


10.學螞蟻種類

另一樣睇《蟻俠》嘅得着，就好似上咗堂生物課，電影會向觀眾展示唔同種類嘅螞蟻，包括子彈蟻、瘋蟻、火蟻、木蟻等，重會透過劇情講解每種蟻嘅特性同專長，例如子彈蟻是體形最大嘅螞蟻之一，蟄人時會引起劇痛；火蟻就似建築師，可以組合一起形成仿如橋樑或木筏。當然，講到尾，其實佢哋都係利用呢啲專長，協助蟻俠進行任務，而電影中亦真係動用咗真螞蟻參與拍攝，不過我就睇唔出邊隻係，邊隻唔係囉！

https://www.youtube.com/watch?v=K3CWrncUg5g