「如果你無錢換過條喉，呢個係你嘅問題。」
『屋企入面條喉就話姐，走廊條喉點換呀？』
「咁......如果你無錢買濾水器，呢個係你嘅問題。」
『係囉係囉，你知唔知咁嘅情況淨係換濾芯都換死你呀？』
「咁......如果你懶得換濾芯，呢個係你嘅問題。」
『咁呀，你知唔知市面上冇濾水器可以100%過濾㗎？』
「咁如果你無錢買蒸餾水，呢個係你嘅問題。」
『咁唔環保......如果堆填區爆滿，呢個係你嘅問題喇......』
「其實如果你無錢搬屋呢個係你嘅問題。」
『其實如果你真係有錢搬屋咁我地就唔會愁呢個問題啦係咪呀？』
「其實......啲新樓都有㗎啦！既然避唔到，咁既來之則安之，飲少少無所謂嘅！」
『哈哈哈，咁你話俾我聽你手上支蒸餾水係咩嚟啦，「既來之則安之」都講得出，收皮啦！』
「望咩姐，你無錢買蒸餾水係你嘅問題嚟㗎喎。」
『係囉係囉，咁堆填區爆滿，就係你嘅問題喇！』
「咩呀，膠樽有得回收㗎嘛！」
『係喎，你唔知環保署啲回收商將啲膠直接拎去堆填區咩？政府唔support回收業嘅結果，就係堆填區爆滿，而你——就係幫兇！』
「邊係呀，回收業做唔住係回收業自己嘅問題，關政府咩事吖！仲有呀，回收商將啲膠直接拎去堆填區係回收商嘅問題，關政府咩事吖？」
『你鋪話法吖！你唔好話打風冧樹死人係棵樹嘅責任吖！』
「都話係個人自己唔避開嘅問題囉，次次都係拎呢個例子嚟講，悶唔悶啲呀！」
『你呢個講法我駁過好多次，不過算，總之你心目中政府永遠唔會有責任，我再講多都無用；不過都係嗰句，第時有事睇你又會唔會話係你自己嘅責任啦。』
「你都打橫嚟講嘅，我知道你玩debate好勁啦，但係強詞奪理無用㗎！」
『咁你駁唔駁到吖？駁唔到係咪又係你自己嘅責任吖？』
「咁梗係唔係呀，你強詞奪理梗係你責任啦！算，我做嘢先，唔得閒理你啲廢話。」

（完）