menclub
http://menclub.hk/hobby/4091

真的完了吧？《BORUTO》新預告有洋蔥

文：MenClub 魏文青　　


大家有睇開文青寫火影，都知我對呢套嘢有幾咁不滿－－漫畫後期神展開、說好的三部曲唔見咗、電影版出完又開《BORUTO》、到我準備好接受BORUTO，佢喺外傳漫畫又神隱，真係吐糟點滿載。所以我一見到《BORUTO》電影又有新預告，我本來就準備好繼續吐糟架啦，點知呢。







佢一開波，唔係再講BORUTO個又識出咗咩招、又或者敵人係邊個。而係同大家回顧一下《火影》咁多年黎嘅經典情節。令你不禁又諗返起當年睇住嗚門由一個「吊車尾」孤兒，奮發圖強成為一個忍者嘅動人情節，到最後同佐助有情人終成眷屬，再加埋首主題曲，真係莫名奇妙就有啲想喊。



最後仲有岸本(今次我冇記錯啦)老師嘅留言，大意就係話漫畫連載完咗，佢就已經將所有心力放哂落去今次嘅劇場版之中，亦都已經畫唔出更好嘅嘢啦。

其實岸本早排都講過，真係唔會再畫《火影》，而佢目前最想做嘅嘢就係同老婆補返新婚旅行。咪先？佢唔係結咗婚好耐啦咩？係呀，佢話個仔都有BORUTO咁大啦，但都未去到新婚旅行，所以大家放過佢喎。
https://youtu.be/FFPbqldBAwQ

人就係咁，佢喺你身邊嗰陣你當佢唔係一回事，到佢真係要離你而去你又會唔捨得。不過，唔好以為我唔會吐糟－－又話係《BORUTO》預告，BORUTO本人去咗邊？仲唔係成功「悟飯化」？