網上就瘋傳2張2位少女搭巴士將雙腳飛象過河的相，po呢2張相的fb群組話，有群組會員爆料，話該區有人做出冇公德心的事:「頭先搭80K，22:35條港女響第一城一上車就放對腳上對面櫈，我下一站落車前同佢講:『請問你可唔可以放返對腳落黎(嚟)，張櫈其他人都會坐，你覺唔覺你對鞋會整污糟張櫈?』佢答我:『唔覺』佢隔離個fd完全冇勸過佢放返對服落黎。兩條女廿零歲，我趕落車，唔知佢肯唔肯聽。」首先呢位爆料人仕用一「條」「條」呢形容一個女仔係唔啱，要尊重對方用一「個」「個」嘛。

究竟事實係點?《FACE》就搵到其中一位被影美腿，網名Txx Nxxx的女事主，佢話件事根本唔係咁:「根本唔係(件事)，我的確噚日返完工，我就放咗隻腳上去，但其實，我上車...我係遲佢上車好多嘅，跟住我坐咗應該冇5分鐘，佢就落車啦，之後佢就同我講話:『喂，死o靚妹，擺番你隻腳落嚟啦。』」咁佢究竟有冇放番隻腳落去呢?佢咁講:「你(對方)一講完，我都擺番落嚟啦。」

同爆料人講嘅「請問你可唔可以放返對腳落黎(嚟)」、「張櫈其他人都會坐，你覺唔覺你對鞋會整污糟張櫈?」態度差好遠喎，咁女事主有冇回應過投訴人而講:「唔覺」?女事主的答案係:「冇呀，根本冇講過，我直接同佢講話:『好呀!』」投訴人所講的，似乎同女事主所講的相距甚遠。女事主更補充，對方係臨落車先同佢講:「你個死o靚妹，擺番對腳落嚟，你兩個對腳好污糟。」女事主仲話，張相係對方臨落車前影，佢自己都唔知被對方影咗相。

不過呢位晒腿美少女今日接受《FACE》訪問，都承認自己唔應該咁做，「有問題(放腳上座位)，我都覺係我唔啱，因為我都覺得會影響到人哋嘅，咁始終位嚟o架嘛。」咁點解明知唔啱，你又要放腳上座位呢?佢咁解釋:「係因為返完工太攰，我隻腳不嬲有水腫，好易抽筋。」原來係咁，但下次唔好放隻腳上對面座位喇，搵人幫你按摩吓咪得囉！


涉事港女喺Facebook道歉。

呢位港女咁霸氣，梗係俾網民怒插啦，仲有網民極速起佢底，搵到佢Facebook同Instagram帳戶。雖然個位女仔後來，話佢嗰日係因為對腳水腫抽筋先咁做，不過網民繼續咬住佢唔放，話佢冇道過歉。

咁冇公德心，有樣有腳都冇用啦！

http://hk.apple.nextmedia.com/realtime/magazine/20150814/54088526/