喺入正題之前，我要唔嫌口臭再講一次：

唔係人人都適合創業。唔好因為傳媒報導、學校推薦，又或者係覺得「搞 start-up 好型」就狗衝去做。喺你落決定前，不妨徵詢各方友好嘅意見（但不包括你阿媽同埋你女友），否則你好可能唔只輸錢，仲會輸「人生」。

香港 start-up 界有個好奇怪嘅現象：大家好鼓勵年青人一畢業就去創業，一大堆創業支援基金呀 co-working space 呀創業懶人包呀等等等等。大家好似覺得：後生仔趁無乜包伏，去闖下啦。而其實潛台詞就係：要輸就趁後生，試完一次，唔得，就好返去打工喇。



你覺得我抹黑？

兩個由政府帶頭（記住唔係「牽頭」）嘅創業支援計劃：「數碼港培育計劃」以及科學園「網動科技創業培育計劃」都有一個申請條件：曾經申請成功嘅人（係人，唔係公司）係唔可以再申請。

補充：

雖然數碼港科學園呢兩個計劃互為競爭對手（大家鬥搶「客」），但喺申請程序呢部份又相當咁互通。你申請（成功）過數碼港就唔可以申請科學園，反之亦然。

當然大家可以理解為「唔希望有部份人藉一而再申請呢啲基金呃錢」，但兩個「創業支援」計劃有幾多實際嘅金錢利益呢？基本上係無，因為全部都係實報實銷，你要先洗錢，然後先至「有機會」攞返錢。

我唔知大家有無留意，不論係本地定係海外，好多成功嘅創業家都唔係第一次就掂，連Bloomberg都係咁講。而實際上，好多投資者對於 start-up founder 曾經失敗過反而係「加分」位。

我再舉兩個本地例子：

GoGoVan：
你以為一班後生仔搞貨 Van 生意一炮過成功？溫下書啦，每次訪問佢哋都有講係因為本來嘅飯盒生意失敗先有「用手機 App 叫車，免 call 台」嘅諗法。
Green Tomato：
本地手機 App 開發商龍頭。但你知唔知同一班人，以前有一間好成功嘅公司叫 Imoeba，然後執咗？

所以我好奇怪點解數碼港科學園只願意支持「首次創業」嘅人，而希望佢哋第一次就成功。政治啲講，可能真係「土地問題」，因為「創業」其實可能就係另一個「副學士」，等你班廢青虛耗幾年光陰，唔好搞咁多無謂嘢。

但就算唔講呢啲（半）官方機構，如果而家有個人，幾十歲人先至去創業（無論係第一次定係第N次），大家會點睇？



（除非你係「i-banker放棄高薪厚職，創業闖出一番新天地」囉）
http://the-sun.on.cc/cnt/news/20100819/00410_010.html

Welcome to the real (start-up) world.
https://youtu.be/uVKaPkoQQUU

http://www.sor9y.com/2015/08/03/hk-say-no-to-2nd-time-startup/