Netflix話2016年初會登陸香港，正呀正呀！咪住，其實你對Netflix有幾多認識？



1. 咪揀最平plan

其實Netflix超抵睇﹕參照美國月費，入場最低消費為7.99美元（$62）/月，再俾多1美元，重可睇埋高清，佢最貴嘅plan都唔使一舊水，每月11.99美元（$93）就可以同時喺4個裝置上睇片，畫「汁」重係超高清4K（Ultra HD）！「佢一個價己經可以任睇幾萬套電影同劇，冇任何附加費。但千祈唔好揀最平嘅plan，因為只有480P畫面，畫面差到無譜，手機睇都接受唔到囉，俾多蚊就有高清畫面，一定睇高清啦！」



2. 起碼500M寛頻

用電腦、電話、平板電腦睇Netflix從未試過窒機（暫時Netflix亦無任何廣告），睇得好過癮，不過建議大家屋企寛頻最好用500M或以上。「屋企嘅寛頻係1000M，就算經VPN睇高清都全部唔窒，不過睇外國Forum，有啲美國Netflix用戶因為本身用繄2、3M嘅plan，就出現窒畫面情況，所以穏陣都係用500M以上嘅寛頻，睇4K超高清一秒bitrate要成25-34M喎，睇睇下窒機真係好唔過癮嘛。」



3. 識睇梗睇自家製作劇

一講Netflix，大家就會諗起《House of Cards》呢套講述美國政治明爭暗鬥嘅劇集，呢套Netflix自家製作嘅劇真係威到盡。Netflix聲稱有超過10萬套電影劇集，用戶多達2千萬。用得Netflix，通常都會睇佢哋嘅自家製作劇，因為﹕「佢有啲外購劇如《The Vampire Diaries》會慢出面成季。不過又唔係全部劇都係咁一半半啦，有啲電影一落畫就即時會喺Netflix見到。」



4. 電視要有上網功能

美國Netflix唔需要TV Box，佢係直接串流落智能電視、平板電腦、智能手電、電腦同各種配備上網功能的遊戲機，用戶通常用平板電腦同電腦煲Netflix劇。「雖然暫時唔知香港睇Netflix要唔要加TV Box，但如果你部電視有上網功能就方便好多啦。」



5. 善用續播功能

煲劇最怕錯過任何情節，Netflix另1個好處，就係備有播放、暫停、回帶等功能外，重有續播功能，當你睇睇下需要離開平台，下次想再煲劇時，系統會自動直接跳去上次嘅播放位置續播，唔使嘥時間飛帶。