吹水區咩 5p、招 friend 子、收兵等等，不嬲唔太在意。
不過有一樣嘢不得不正視，就係部分吹水區成員聯群結隊洗皮。
之前見過好幾次，個 post 對吹水區某成員不利，部分吹水區成員就入去「傾計」。
佢哋表面係傾計，其實係洗版。
其他會員見到成版 post 變咗吹水 post，自己回覆完只會畀人洗走，仲點會有興趣回覆？
洗版洗到其他會員冇興趣回覆，呢班洗皮撚就得逞。

各電視台會搞區議會選舉論壇，眾所周知，民 X 聯其中一條策略係「一旦唔夠人講，就唔理三七廿一，同你玩疊聲、遊花園」。
玩疊聲、遊花園有冇犯規？冇，而且佢哋其實係答緊對方問題，只不過佢哋會喺對方講緊嘢嘅時候「答問題」，帶你遊一遊花園，拖到發言時間完結就搞掂。
佢哋同部分吹水區成員有咩分別？

維園阿伯一樣，佢哋嘅策略係「相反政見嘅嘉賓一講嘢就攞大聲公嘈」，聽唔到嘉賓講乜，亦聽唔到維園阿伯講乜。
但維園阿伯真係唔知自己做緊乜？同嘉賓玩得疊聲，就預咗人哋聽唔到自己嘅意見，所以維園阿伯根本唔係想表達意見，而係要令主持冇癮、嘉賓冇癮、觀眾冇癮。
維園阿伯同部分吹水區成員有咩分別？