https://www.youtube.com/watch?v=ZiPbbukLq_Q&feature=youtu.be


本地跳舞女子組合FFx近日憑一首900蚊廉價歌曲《Sugar Baby》MV，橫掃各個社交平台，youtube點擊率每日倍增，今日中午已經有130幾萬人次睇過。不過，MV就畀彈到一蚊都唔值，批評佢哋想模仿韓式MV，但就連基本排舞、打燈都全錯，一地負皮，最搞笑係有網民直頭將佢哋個MV變成天線得得B版，取笑佢哋舞步係抄天線得得B。

究竟呢個由頭錯到落尾嘅MV，問題係咪真係出咗喺900蚊成本嗰度？蘋果為咗證實呢樣嘢，決定連900蚊都唔駛FFx畀，免費幫佢哋拍攝一個有排舞、有燈光、多角度、零成本嘅全新MV，仲將原曲填上勵志歌詞變成《衝啦！Baby》，將同一班主角，用完全唔同嘅拍攝手法，變成一個完全另唔同feel嘅MV。

其實當舊曲加上新詞，FFx都已經唱出唔同嘅感覺，加上由頂尖舞蹈編排導師黎偉倫（Dee Lai）出手，由原本個好似冇乜動作嘅MV，都變成充滿住動感、活力，而衫都一樣係兩套，但當場境換咗兩個，加上燈光效果，成個MV即刻冇咗之前嗰種天線得得B嘅感覺，變咗真係有韓國女團嘅味道。