十優港姐冠軍麥明詩，又靚又叻，她的25歲大律師男友林作都唔弱，最近參選區議員的他開口埋口都是政治，為了增加選民信心，林作早前將他鑽石山的物業作為大本營，接受《e+娛樂》獨家深入採訪，發現全男班的私竇內放滿選舉物資，雜物散落一地，就連孖煙囪都隨地放，林作竟不羈的說：「男人老狗吖嘛！」唔通麥明詩就係睇中這股「男人味」？


麥明詩（Louisa）男友林作（Joseph）最近競選黃大仙龍星區區議員，上年由半山千多呎豪宅搬到鑽石山的星河明居，方便落區直接接觸及了解區民所需。《e+娛樂》早前獨家走進林作的亂爆搏鬥屋。為方便落區，他與選舉代理人兼好友Karl共住， 除了廳中放滿宣傳單張和易拉架等宣傳物品外，房間地上亦有一大堆着過的恤衫、襪、還有孖煙囪！他不羈的說：「男人老狗吖嘛！」

《e+娛樂》記者更在廁所發現女性常用物品，如脫毛膏和透白面霜等，難道屬於女友麥明詩？但林作依然鎮定，更搞笑推得一乾二淨：「脫毛膏一定唔係我嘅！我有個室友㗎，總之搵到啲Bra呀、咩尷尬嘢，都係你㗎Karl！佢自己着㗎。」Karl隨即反擊爆大鑊：「得你帶女朋友上嚟咋喎！」林作即用眼神示意好友封口，然後說：「梗係唔會啦，點會！呢度得我同佢。」Karl都補鑊話：「脫毛膏係我用嚟脫心口毛嘅。」

林作和麥明詩的情侣關係雖已是公開秘密，林作仍堅稱二人是「好朋友」，後生仔女當要先打拼，以免影響大家的事業，明晒！

冇諗過結婚

其實麥明詩當年會考攞完10A後，揚言要以大律師銜頭選特首，作為其男友的林作就表示未想過選特首，「佢16歲唔知碇亂講嘢啫，你依家問我佢係咪對政治真係咁有興趣，我唔覺得有！好多人話我咁嘅條件點會淨係睇區議會咁短視呀，但我真係冇諗過，亦冇諗過今次會搞到咁大，都係因為個麥明詩啫。唔好再攞佢嚟做新聞啦，我只係想腳踏實地做嘢。」

林作和麥明詩門當戶對，同樣擁有一份無敵CV和出身，但幾百萬人看着麥戴完后冠一刻，竟然冇佳麗上前恭賀，難道無敵真係最寂寞？林作維護女友說：「我都有睇，但唔係好覺，佢企冠軍位喺中間咁遠，啲人未行過去啫！其實愈係有能力嘅人，愈唔應該縮埋，要行出嚟為社會做啲嘢，希望麥明詩用依家所爭取到嘅嘢，為社會帶來更多正面影響，而唔係單純地喺啲娛樂新聞出現，淨係畀人揭私隱，我覺得呢個係冇意義同嘥咗佢。」有事業心又有才華，嫁得過！


雜物滿布林作屋內布滿雜物，當中有不少宣傳物資。


晒幸福林作與麥明詩甜蜜合照，晒幸福喎！


隊可樂因選舉、律師工作繁忙，林作一回家便隊可樂解渴。


林作將整個飯廳都堆滿選舉用的物資，明顯對選區議會一事甚為着緊，他說：「歷史上好多人物喺25歲已經闖出一片天，我偶像同校友邱吉爾喺25歲已經係英國國會議員，我依家先選區議會咋！」


驚現女士用品▼只有兩個麻甩佬用的廁所內，竟然有脫毛膏、亮白保濕面霜（紅圈）！


林作每日在中環放工後，就會搭港鐵返鑽石山屋企做選舉工作。


房間凌亂▲林作房內擺着選舉易拉架，地上更有一堆着過的衣物。


孖煙囪隨地放▲衣物堆中除了恤衫、襪、還有孖煙囪。


落區三人組▲選舉代理人Karl（左起）、林作、助選團成員Edmond，齊齊拎住宣傳單張、易拉架落區接觸街坊。