運輸及房屋局局長張炳良上任以來風波不斷，高鐵工程延誤同超支後，公屋被揭有鉛水，近期又發生汲水門撞橋事故，真係黑過墨斗。八方發現，每逢出咗事故，張炳良都會話「經一事、長一智」，好似今日佢開完跨部門會議後回應撞橋事件，佢亦拋出呢句總結經驗。

唔通係佢口頭禪？難怪咁熟口熟面。張炳良月初回應鉛水事件時，承認政府認知不足，「經一事、長一智」；舊年6月喺高鐵超支事件被指過分信任港鐵時，佢亦話會「經一事、長一智」。嘩！局長經歷過咁多事，智慧一定增長唔少。

查實此金句非係張炳良獨享，水務處處長林天星之前回應鉛水事件，亦曾經話過「經一事、長一智」㗎。究竟梁班子仲需要增長幾多智慧，先能夠應付一單又一單爆極唔停嘅風波呢？



張炳良次次出事，幾乎例牌會話會「經一事、長一智」。