雜誌：講番愛國敬禮個舉動，你咁後生，真係咁有感受咩？

梁烈唯：當年係侵華時期，佢地真係攞條命，我亦可以問，如果你係基督徒，耶穌死，你都未係宇宙，點解你會信基督教？會覺得耶穌或者神對你咁重要？同樣既問題，唔關佢對你有無即時影響，而係個人既修為，所有幫過我既人我都好感恩，即使佢冇幫過我，而我知道佢做左啲好事幫左其他人，我都好appreciate，我覺得個世界要係咁，多啲感恩，個世界先會變得更加好，依家個社會，太多野鬧鬧鬧，網絡既發達，大家可以好隨意，不需負責任咁鬧，有啲人係我instagram，留啲好攻擊性既字句，其實我係可以告佢同100%告得佢入！其實大家可以peaceful啲，大陸人落黎香港藥房買藥，你覺得佢好衰，可能90後仲細，我地70、80後係好鍾意去日本藥房買藥，唔通日本人又叫我地蝗蟲咩？你話佢有啲人係街邊小便，好多外國人我都見到佢係街邊小便架，我唔係認同呢樣野係岩，但個眼光要放遠啲，你如果因為有啲大陸人既行為唔好而唔承認自己係中國人，我覺得係可悲，你係香港出世既中國人係不折不扣既事實，你要記住大陸岩岩開始開放，有好多人未見過外面世界係點，有啲野佢地係未做得好，但唔代表永遠都做唔好。

雜誌：好多網民認為你敬禮係討好大陸，想有更多工作機會，你又係咪？

梁烈唯：我真係要同果班網民講，你地實在太膚淺，你根本就唔知個架構係點，大陸依家個娛樂市場係發展得非常之好，係咪仲需要你黎擦我鞋，然後俾工作機會你？唔係囉，人地睇緊既係你既talent啦！我做呢件事冇諗到係咪擦鞋、呃like呃讚，因為我唔係活係網絡世界，我係活係現實世界，可能有啲人覺得我同樂小姐（樂易玲）friend、同Sandy（余詠珊）friend，我今日話俾你知：我係擦鞋呀，你吹呀！？你咁叻你擦俾我睇下！你可唔可以擦到佢鞋丫？你咁得閒諗呢啲，諗下自己好過啦！青春唔係好多，到你追唔到，就唔好鬧個政府衰，經濟差，買唔到樓，你一日淨係對住個電話、電腦，你呢一世都買唔到樓架喇！