去 KickStarter 玩集資，產品一定要有噱頭，說直接一點，就是要令平平無奇的功能，講到天花龍鳳般。UsBiDi 係一條智能手機充電線，放上 KickStarter 集資，不出幾日已超出 $35,000 澳元的集資目標（截稿時已籌得 $42,879 澳元）。


UsBiDi 充電線有幾特別呢？KickStarter 介紹頁中，就話 UsBiDi 可以「自動關掉」（Power Shut-off）、保持電池健康及延長壽命（Keep Battery Healthier & Extend Its Life）、快 2 倍充電（Charge 2x as Fast）等等。老老實實，USB 手機充電線絕對係現代人嘅必需品，講到咁勁，怪唔之得咁快達成籌款目標啦！


想買？「早鳥」優惠已經賣晒，餘下 US$18 套餐俾你揀，即約 HK$140，會有一條 UsBiDi 充電線，Lightning 或 Micro USB 頭任選，預計明年二月出貨。不過，HK$140 買一條充電線，係咪真係咁抵？



噱頭一：延長電池壽命堅唔堅？

睇 UsBiDi 介紹，話有 Power Shut-off 功能，仲話可以保持電池健康及延長電池壽命，究竟點做到呢？睇清楚官方介紹，原來 UsBiDi 內置 PCB 電路板，當手機完全充滿電之後，用戶毋須拔充電線，充電線也會自動停止充電，可以避免浪費電力又或者令手機長時間而導致過熱。

充完電會自動停止充電，聽落好似幾實用，但事實上，早前英國獨立報引述科技專家 Jessie Hollington 意見，話現時不少手機均採用 Lithium Ion 或 Lithium Polymer 電池，它們充滿 100% 後，都會自動跟充電電路斷電。咁究竟，UsBiDi 個自動斷電功能，會唔會係多餘咗？



噱頭二：快 2 倍充電原來係指……

UsBiDi 仲話可以「Charge 2x as Fast」，點樣快 2 倍呢？你估「三倍速」咩！？UsBiDi 充電線原來兼具傳輸功能（大家都知有不少 USB 充電線只能純充電，無法傳資料），在手機插頭端設有一個按鍵，用戶只要按鍵一下，就可以暫時終止「傳輸資料」功能，令 UsBiDi 變成一條「純充電線」。所謂的 2x 充電，就係咁解！喂，咁如果我想充電充得快，我直接用一條純充電線會唔會平少少呢？仲有，叫得上傳輸資料，就一定係駁電腦先得啦，即係話 UsBiDi 個所謂「2x」充電功能，只能適用於駁電腦充電時使用。



UsBiDi 仲有一個功能，就係擁有磁吸能力！不過這裡所指的磁力，並不等如 Apple MagSafe 充電插頭般，藉磁力將線頭與機身充電埠連接起來，而只是 UsBiDi 插頭有磁力，可以貼在金屬表面，方便收藏而已！

雖然唔係用磁力吸實接駁端，但可以把充電線用磁力貼在金屬表面，都算方便，唔易整唔見。

總結：HK$140 買條好線？

雖然 ezone.hk 覺得 UsBiDi 部分功能都只係噱頭而已，但說到底都算頗為實用。問題係，你會唔會 HK$140 買條 USB 線呢？又咁講，如果你係用 iPhone，買 Lightning 版本，感覺又好似抵返少少……

Source：ezone.hk、KickStarter
【專題報道】

- See more at: http://www.e-zone.com.hk/channelnews.php?id=9521#sthash.yURE4BkZ.dpuf