見到好多人討論包唔包容，包容嘅話大愛人權、人哋冇得揀，唔包容嘅話低質人口只會令社會現狀變差。
其實可唔可以咁諗：包容係一定會有，問題係應唔應該包容「不包容別人」嘅人。

社會能夠協作壯大，其中一個因素係包容，包容嘅原因可能係公義、私利等等，但包容一定存在。
例子：當年外來嘅英國人、外來嘅大陸商賈，如果唔包容佢哋，可能香港仲係個魚港。

如果包容「包容別人」嘅人，呢班「包容別人」嘅人起碼唔會排擠、抵抗、拒絕本地嘅生活文化同制度 (如果畀人文化侵略，只代表外來文化比本地文化更優勝，即係十九才子講嘅「崇優」，冇乜好怨)。

但包容「不包容別人」嘅人，結果就係包容者要處處遷就。包容者退一步，「不包容別人」嘅人就更進一步，最終勝利者 (即係社會主導者) 唔需要比拼文化、競爭力，而係單憑人數，就可以主導社會。

正如去南洋、美國嘅中國人，唔去融入當地文化，反而整個「China town」出嚟，當地人就會覺得自己地方畀人劃咗塊地出去，擺到明係侵略，梗係會討厭。

反之，如果呢班人得閒會食下 fish and chips，講下英文，融入本地文化，又貢獻 GDP，我睇唔出點解本地人會討厭佢哋。就算因為比本地人有錢所以畀人討厭，現實啲講句，如果你有錢到有生命危險，你應該有能力搬去第度，繼續過舒適生活。