多個月前到茶樓飲茶，隔離枱有一個後生同兩個老人飲茶，睇落似係一家人。

老人：真係搞鬼錯，成班人霸住條馬路，阻住晒。你睇下班的士司機損失咗幾多？表達意見係佢哋自由，但唔好阻住人哋搵食呀嘛……

老婦：係囉，正一阻住地球轉，畀佢哋話事仲得了嘅？

後生：做咩啫你哋，保皇黨支持廿三條你哋唔出聲，保皇黨用納稅人用成千億起高鐵你哋又唔出聲，咁你哋而家憑乜嘢出聲？

老人：咩呀？唔畀出聲咩家陣？香港有自由架！你哋而家阻人搵食，點解唔可以出聲呀？

後生：你根本就兩把尺，一把度自己，一把度人，你話人阻人搵食，乜廿三條、高鐵、全民退保唔會影響你咩？你幾廿歲人唔係咁天真呀嘛。

老人：你識咩呀，我食鹽多過你食米呀！

後生：係喇係喇，香港有自由呀。呢班保皇黨搞到冇得全民退保呀，包括你個仔，我呀，想攞返少少錢都唔得呀。

老人：人哋支持啲乜關你咩事啫，唔通你會少咗忽肉咩。

後生：大佬呀，錢嚟架，自由嚟架，你係咁清高嘅，我下個月開始就唔畀家用！

老人當堂語塞，停咗幾秒唔敢出聲。

老婦：保皇黨有咩唔好呀，又有得影平相，一打六蚊，又有月餅派，每年都有香港一日遊，你都冇佢咁好呀。

啪！後生兜嘢拍落張枱度，隔離嗰幾枱人開始望住佢哋。

後生：啲平相月餅一日遊值幾錢呀？夾埋一年一千好未？我一個月家用都五千呀，除開一個禮拜都千幾蚊呀，你攞佢哋嚟同我比？

後生飲一啖茶，繼續鬧。

後生：你哋咁鍾意保皇黨呀嘛？得，你以後攞家用就去問保皇黨攞，唔去走嚟問我。嗱，我講明先，以後嘅選舉，如果保皇黨贏咗，我就唔會再畀家用！

後生放低杯茶，開始執嘢。

後生：你講到保皇黨咁照顧你，我而家走喇，你哋搵保皇黨埋單啦！

後生憤然離開，身影漸遠。呢陣時老人拍枱大鬧。

老人：哼！呢個仔我當冇生過！

老婦：算啦，唔投保皇黨咪唔投囉，阿仔一個月畀幾千蚊家用喎，保皇黨啲蛇齋餅粽夾埋夾埋，一年都唔知有冇一千蚊。

老人：嘿！真係谷鬼氣！

老婦：為咗啖氣有乜謂？蛇齋餅粽可以唔食，但家用唔可以冇架嘛。一張票啫，唔投咪唔投囉。

呢個後生真係唔要得，投票係個人意願，點可以用利益影響個人意願？呢種行為極其卑鄙無恥，我要在這裏對這種行為進行嚴厲批評，並予以強烈譴責。