http://hk.on.cc/hk/bkn/cnt/entertainment/20151124/bkn-20151124200439906-1124_00862_001.html

思琦否認曾遭性侵，仲話如果有被性侵，佢唔會走得甩。

【on.cc東網專訊】女藝人楊思琦出席活動時，被問到10年前與鍾嘉欣（Linda)、陳浩民及唐文龍等在番禺拍無綫劇《人生馬戲團》期間，唱K消遣離開時被「追斬」一事。盛傳當時失蹤數小時的思琦，憶述當時情況，內容和Linda所說的一模一樣，她亦表示不知道為何會遇到這種事情。

認曾被要求封口

她指唐文龍事發時在場，但就不記得陳浩民是否在場，至於是否無綫高層樂易玲不准她們提及此事，她坦承說：「嗰時公司係唔可以講，依家都過咗10年，同埋身邊好多人都知道，Linda都講咗佢嗰part，所以唔緊要啦。」

「係我人生最接近死亡嘅一次」

問到二人是否「匿埋」兩小時，思琦說：「實質匿咗幾耐真係唔知，淨係覺得好耐，係我人生最接近死亡嘅一次，多謝Linda成為我嘅生死之交。（傳你兩個畀人性侵犯，其實有冇？）梗係冇啦，如果係咁我哋個人都冇埋喇，命都冇，仲點會畀我哋走得甩，真係生死邊緣。（有冇咩後遺症？）會有陰影，依家夜晚出街都會驚，會好留意啲van仔開門聲，嗰時事發後有發惡夢，覺得好內疚好無奈，因為大家係同我慶祝生日，有幾個幕後人員都受咗傷，畀人斬傷手腳流晒血。（會唔會怕咗返內地工作？）我都成日要返內地，除咗嗰次嘅事，好彩無其他更嚴重嘅事發生。」