蘋果日報
http://hk.apple.nextmedia.com/enews/realtime/20151203/54497144

【抗爭定維穩？】《網絡挑機》紅人Eminleo 原來係深圳政協！


Eminleo今年5月做咗深圳政協，唔知佢開會時，會唔會爆粗鬧左膠。

呢排成班Youtuber網絡紅人好似伍公子、司徒夾帶、Eminleo、薑檸樂等幫大台拍《網絡挑機》，噚晚個集伍公子同Eminleo就串爆大台拍膠劇。

27歲嘅Eminleo、以《希特拉都取消唔到有線合約》、《爆笑字幕版-足球小將》同《九唔搭八》喺Youtube走紅，累積點擊有成3千萬。Eminleo以為佢淨係鍾意打機、做過商台，原來佢背景並不簡單，除哂玩轉網絡界，今年5月仲從政，低調做咗深圳政協。

《蘋果》從政協深圳市委員會嘅網頁，搵到佢真名陳宇峰（陳宇峯），佢係香港特區嘅邀請人士入選咗做深圳政協，同屆獲邀港區人士有玩具大王蔡志明女婿馬鴻銘同佢個女蔡加怡。（參考資料 http://bit.ly/1Q22VUR )

平時Eminleo都係tee恤牛仔褲打扮，見佢喺內地開會就着晒西裝打晒紅嘅「政客look」，簡直兩個樣。其實Eminleo背景應該唔弱，早年佢接受訪問講過自己係倫敦大學管理系畢業，曾被爆家住3千萬九龍塘豪宅嘅富貴家境。

據知，Eminleo去開政協會嗰時，都好似佢喺自己YouTube片一樣咁講唔停，當然冇爆粗，周不時發表偉論，屬勇於發言一族。


YouTube紅人Eminleo，真名陳宇峰，於倫敦大學管理系畢業。 (互聯網圖片)


Eminleo同伍公子喺大台節目，串爆膠劇。


網絡挑機結果反被挑


Eminleo求學時期已玩轉網絡。


Eminleo出名嘅短片有《九唔搭八》、《希特拉都取消唔到有線合約》同《爆笑字幕版-足球小將》。