花膠那：

　　既然你咁耐都唔搵我，睇嚟我哋緣份已盡，從此成為陌路人。唔怕同你講，我完全唔覺得你有誠意去建立進一步關係。

　　你知唔知中學啲女仔同我係主動打開話題，我真係咩都唔駛做，其中有個有錢女叫甜水，佢樣唔差，追我追到出晒面，差唔多送到上門，但係我都係冇接受。你可能話有食唔食，罪大惡極，但係我真係對佢冇 feel，我唔會為咗錢出賣我靈魂，我個人係重 feel 多過物質。花膠，既然你咁冇誠意，我都冇謂唱獨腳戲，無謂浪費大家時間。你嗰啲所謂技巧甜水已經用到爛晒，你估我睇唔出咩？

　　或者我之前語氣係重咗啲，我都知你唔開心，相信你已經對我冇晒幻想。其實我覺得我哋性格好極端，你諗嘢好理性，我諗嘢好感性，喺埋一齊簡直會火星撞地球。我覺得你理性到好似男人，而我就感性到好似女人。我都唔知點解會揀甜水，成個藝術家脾氣。點都好，你係我見過最聰明嘅女仔，真正美貌與智慧並重，或者你再高啲就完美。你而家應該憎到我死，不過我寧願你憎我，我會冇咁內疚。

　　你知唔知呀，同你一齊好大壓力，因為你好進取，而我追求自由，加上女仔青春有限，我無謂浪費你時間。

天腸