程大嫂、常歡又返黎啦！《家有囍事》加長版賀新年

近排無綫鍾意喺凌晨時段重播經典劇集，仲成功掀起深夜煲劇熱潮，懷舊熱更令唔少劇中演員紅返，好似《大時代》重播嘅時候，竟然可以比新劇更加受到關注。估唔到電影界都開始重播經典電影，講緊嘅就係70後同80後嘅集體回憶《家有囍事》。

想當年《家有囍事》喺1992年上映，卡士超勁，包括有：張國榮、黃百鳴、周星馳、吳君如、張曼玉等等，而唔少經典對白例如「邊個淫蕩啊，你淫蕩；邊個淫蕩啊，我淫蕩！」到而家啲人都仲記得。每到新年都會推出賀年電影嘅黃百鳴今年就決定將呢套經典電影重新配音同修復、再加10分鐘從未曝光嘅絕密片段，硬撼其他大片。其實呢套加長版其實就係韓國版嘅結局（小心劇透）。[#c7c7c7]香港版結局就由周星馳唱閩南話版《同是天涯淪落人》、吳君如同黃百鳴好返做結局。而韓國版就係講吳君如離家出走之後被班賊綁架，而張國榮同周星馳為咗救返佢就扮綁匪，諗住綁架返吳君如離開，點知後來撞到班真賊，最後由張國榮用把機關槍殺出重圍勇救大嫂。[/#c7c7c7]


不過其實今次呢套加長版都唔係第一次喺香港上映，佢之前有喺科學館放映過一場，有指當時觀眾見到哥哥未曝光啲片段都已經笑到拍晒手掌。有人就話因為黃百鳴今年冇晒貨，搞到要食老本。不過佢今次呢套電影淨係會喺佢旗下嘅朗豪坊戲院上映，就知佢對呢套電影幾有信心啦！