現實滲透網絡，網絡滲透現實
點解我重視保密
一年幾之前，有一日，某會員用陳述句子、用肯定嘅語氣講出我嘅登記電郵 domain 同背景，然後另一會員又用肯定語氣話係。就由嗰一刻開始，我就覺得膠登其實唔係咁安全。在此之前，我一直好小心，專登唔討論關於呢個 domain 嘅任何嘢，估唔到有人講出我嘅資料。

及後，我開始留意 imagine。此人性格招搖，囂張跋扈，權慾薰心，鍾意標榜功績。本來我只覺得 imagine 係性格討厭，估唔到此人居然盜用會員資料。嗰陣我大大力聲討 imagine，因為我真係好嬲，原來一個號稱「方舟」、「避難所」嘅地方，處理會員資料竟然如此兒戲。

ice 同會員矛盾好多，佢鎖完 post，點知冇幾耐又唔鎖。以為佢唔鎖，點知佢又鎖，有時仲無端端鎖。有人話佢公報私仇 bam 晴仔，我冇留意，所以唔評論。喺三藏爆料之後，我勃然大怒。權慾薰心嘅人一旦有現實利益，往往就變得毫無底線。我不能想像一個咁嘅人做 admin 有咩後果，所以我決定搞大件事。

Admin 要 ban 人易如反掌，打句 command、撳個制就得，會員喺 admin 面前弱小如螻蟻。或者其他人話我誇大、夾硬嚟、唔現實，但我只可以用呢啲方法叫人保護自己，唔好畀 admin 越過界線。可能我條界線畫得比其他會員前一啲，但出小事唔表態反對，唔通等到出大事先反對？

呢個社會，守住底線嘅人唔多，我只可以叫大家保護好自己，需要出聲就出聲。或者係賤格，或者係搞破壞，或者係耍手段，但唔好猶豫。當你哋係弱者，大概只能團結同變得兇狠。網絡如是，現實如是。

**********

寄語《膠紙》：
或者我之前講得隱誨，而家唔怕講清楚。

諗清楚你哋係咪要討好唔同水平、喜好嘅讀者。
諗清楚你哋要嘅係自娛自樂，定係闖出去。一群自娛自樂嘅人，難以堅持，亦不利闖出去。
如果一個人擁有賣到錢嘅文字，而創意有限，大概唔會做無名無利嘅事。
要闖出去，要有力排眾議、不顧面子嘅勇氣。

**********

平時寫嘅故只係閒時瘋想，酒後瘋言，冇認真諗過度過，節奏、情節、文筆原全亂咁嚟，賣唔到錢，所以唔好上心。