由韓片《3個特攻美少年》男星李玹雨孭飛嘅KBS劇集《武林學校》，自上星期一開播以來收視一直墊底，噚日播出嘅第4集就有4.4%，已經比前一集上升咗0.7％，不過依然墊底。《武林學校》喺韓國唔收得都算，佢於最新一集中就有一幕燒人民幣，即時辣㷫內地網民。

於噚日播出一集中，講到李玹雨跟李弘彬於荒山野嶺，為咗生火，「上海集團公子」李弘彬就拎出人民幣嚟點火，仲話：「這是價值幾多錢嘅火呀。」
劇集一播出，當然引起內地網民強烈不滿，狂鬧編劇腦殘，又話要抵制《武林學校》，更有人留言「編劇嘅地址係咩？我要寄刀片」、「唔燒你哋嘅韓圜？」、「最近韓國人嘅膽都好大」等。
根據《中華人民共和國人民幣管理條例》第43條，故意毀損人民幣，由公安機關給予警告，最高罰款1萬元。
另外，KBS方面見咁多網民炮轟，今日即急急為事件發聲明道歉，亦強調佢哋冇意貶低，又話之後如重播相關片段及推出DVD時，都會刪除有關場面。

http://hk.apple.nextmedia.com/enews/realtime/20160120/54667931