【寵物】我一腳飛走隻狗　內疚左n年

是咁的，n 年前呀媽拎隻狗仔返黎, 養到同我熟左後, 有日拎左出街"比左人".
隻狗係間屋只有我同佢玩, 只有我會呵佢抱佢. 相處半年就送走左.

大約一年後, 我地已搬屋, 都幾遠下, 搭巴士快都要半個鐘, 有日行去巴士站, 離遠有隻狗狂吠, 以極速向住我跑, 我望住佢....唔多對路, 簡直痴線狗咁 (o個度好多流浪狗, 但從未試過咁情況), 因為聽過狗咬人要打破傷風針、又話有瘋狗症... 好驚比狗咬 一直留意住佢... 真! 真係跑向我 ! 我企個位高出幾級樓梯, 隻狗半跳半撲飛埋黎攬住我隻腳, 我好驚.... 驚佢咬我 我郁隻腳佢都唔放, 係度汪汪叫, 但冇咬我, 不過作狀咬我條褲, 動作好快, 癲左咁 我驚起上黎, 大腳一伸 !! 就甩左隻狗... (當時佢真係雙手抱住我隻腳, 我冇踢佢, 只係順勢"飛"佢出去) 隻狗一飛 飛左去欄杆出面車頂 (停車場黎, 車頂與我企個位同高度), 狗狗汪汪聲受驚就跑向遠處.... 消失了.

我驚魂未定, 確定隻狗唔再返轉頭"襲擊"我先安心 d...
之後, 諗返.... 佢要咬我的話, 早已咬左, 但佢淨抱住我, 冇咬過我, 只係作狀咬.
點解離咁遠 鎖定我係目標呢?
....
好多疑問...
開始諗返... 之前"送走左"o既, 係白色小狗, 呢隻亦係白色, 不過"長大"左, 屬中小型, 有d似.
.... 開始懷疑..... 佢 真係黎搵我 ?... 成功行左幾區比佢搵到? 隔左幾個區, 只會搭車來往兩區, 咁都有可能搵到? 搵到我後.....比我一腳 fing 走.

此事距今已 n 年, 佢應該早已歸天. 我冇辦法補救, 內疚到今日
希望狗狗可以原諒我, 當日我唔夠鎮定, 冇同你相認.
一諗到佢o既故事, 我就好內疚, 係一個遺憾.


利申: 真事