轉貼原因係有趣，非本人諗法
點有趣? 從女人角度睇男女不同既擇偶條件，女人拜金





-----------------------------------------------------------------------------------------------------------------
好多男仔會問：點解一定要我咁搏命咁追佢，佢先肯同我一齊？
佢明明都中意我嫁！

以女性角度黎講，條女覺得條仔咁樣會比較有誠意，同時佢都會更加有安全感。
皆因條仔喺一條女身上付出既野越多，佢就越覺得唔可以咁輕易放手。
付出左咁多感情，送過咁多禮物，用左咁多時間同佢出街，陪佢做呢樣做個樣，
要是就咁放手，咁咪好唔甘心。相反，假如條仔從來都係做接受個方，
得個女仔一味付出，條女會覺得好無安全感；因為條女會覺得，
當條仔覺得佢唔岩味既時候，就可以毫無負擔咁o趙完鬆。當然啦，
呢個理論其實係唔岩既，有讀過經濟既朋友都應該明白“沉沒成本”（sunk cost）既道理，
正如返學就遲到，應該繼續等巴士定轉搭的士的情況一樣，
作為一個讀過經濟既人，你唔會因為你等左好耐巴士，無理由就咁走左去，
而繼續等巴士；相反，你會選擇即刻跑去截的士。
因為你之前付出左用黎等巴士既時間係追唔返嫁啦，但你宜家即刻沖去搭的士呢，
都仲有可能唔遲到。不過好多時候，當一件事涉及大量感情既時候，
就無乜可能咁理智咁灑脫。

另外，亦會有男仔會問：點解一定係男追女，女追男唔得咩？

大部份女仔覺得，如果換著係女追男，條仔就會唔珍惜，
條仔會覺得佢無論做乜，條女都會繼續中意佢。
尤其係當呢樣野發生喺未拍拖既階段，
條女（或者佢既女仔朋友）會覺得一開始就咁寵條仔，
到時行埋左之後條仔一定只會變本加厲地衰。

此外根據一個出處不明既理論，“男追女隔座山，女追男隔層紗” 係錯既，
女追男不但唔係隔層紗，喺某程度上係唔可行既，特別當條女唔索既時候。
男人比女人更加注重外表，姐係如果你真係生得唔靚，
無論你點追條仔都好，佢都會因為你樣衰而唔接受你。
當佢帶你出去見朋友都覺得丟架既時候，你無論對佢既好，佢都唔會睬你，
部份賤男，甚至會收你做女兵。對於男仔黎講，面子係最重要既；條女靚，
帶出去就威，就有面子。而且，根據頭先所講，條女對條仔越好，
條仔就會越覺得理所當然，真係唔會話咩因為好感動，而同條女一齊。
你滿足唔到佢下半身，你對佢好，佢只會越黎越覺得你似佢老母，
多過佢條女。男人擇偶，外貌同身材最重要既原因係因為其他野對於佢地黎講，
真係無咁重要。正所謂男人唔可以無面，假如條女既家底，
薪酬同學歷都好過佢，佢絕對唔會想同呢條女一齊，因為佢會無面同自卑，
導致佢秒秒鐘生活喺水深火熱之中。你話性格重唔重要？d男人一定話重要，
不過前提係個樣要索先。當你既外貌一開始完全吸引唔到佢既時候，
佢完全唔會有興趣了解你既性格。咁當然啦，亦有男人會話，
佢地中意有氣質既女仔；氣質同外貌係相輔相成，豬扒唔會有氣質，
有氣質唔會係豬扒。所以話，“your face your fate”，生得樣衰真係原罪。

但係去到男追女就唔同，條女一開始可能真係未必中意你，但只要你對佢好，
比心機追佢，佢會因為你既用心而感動，而嘗試忽略你外表既不濟，
同你一齊。同埋就算普遍女仔中意靚仔，佢地都唔會想搵靚仔做男朋友；
因為如果條仔太靚，條女一定好無安全感，自己條仔成日比女圍，
條女真係會發癲。相反你話醜男溝左條索女佢會唔會無安全感，都會既，
不過比起無安全感，佢對於自己駙馬身份既自豪感，已經蓋過一切，
佢打底曬所有條女身邊既兵，個種滿足感，簡直難以言喻，唔係講笑。
就算最後佢同條女分手，佢可能會傷心一段時間，
但佢曾經成功溝過女神既呢個豐功偉績，係永遠存在，無可抹滅既。
就算佢去到七老八十，佢都會記得，佢曾經喺佢十幾二十歲既時候溝到過一個女神。

女仔對於男朋友既標準，雖然話因人而異，但都離唔開個幾樣，
你話樣唔重要呢，就絕對唔係既。不過其實對好多女仔黎講，只要你生得正常，
佢望得順眼就ok。佢在意既好多時候就係條仔對佢好唔好，有無錢，
同有無才。當女仔選男友既標準有好多項既時候，
外貌所佔既比率就會相對上降低；尤其係條女唔想拍散拖，而想搵條仔結婚既時候呢，
條仔既發展潛能就比條仔既外貌條件更加重要啦。首先，條仔有無錢好重要。
有無錢分兩個層面，第一係條仔本身有無錢，第二係條仔屋企有無錢。
條仔有無錢好取決於佢有無才，因為有才無才好影響佢將來既發展潛能。
條仔就算呢刻無錢，唔代表佢未來都無錢。假如佢有才（例如：佢高學歷，
係專業人士，或者有非常專門而又搵到錢既專門技能），
總括姐係有機會成為成功人士既話，咁條女會覺得搏得過；咁當然啦，
如果條仔已經係成功人士呢，就更加有保障啦。因為當條女想到要結婚既時候，
佢唔會接受到以後同條仔結左婚，佢要養返條仔轉頭；最少都要唔洗挨餓，
生活到，可以一齊儲錢買樓啦。當然如果條仔可以有經濟能力到養埋佢，
咁就當然最完美啦。但係呢，所謂成功靠父幹，就算條仔唔係話個人好標青，
咁但係佢有一個良好既家庭背景backup呢，咁都ok，起碼當你地唔掂既時候，
都可以得到家庭既幫助。先唔理女仔會唔會介意搵一個一世都廢過自己既男人過世啦，
但如果我係男仔，廢過條女咁多，甚至要條女同我一齊挨苦，
我都覺得丟架自卑啦，唔係以為對條女好就可以掩飾你既廢呀？唔好傻啦。





拎:http://hkudryclub.com/?p=25490