http://hk.apple.nextmedia.com/realtime/finance/20160202/54715629
===================================================================
「主能夠，主能夠，我知祂能夠，我知救主能帶領我經過一切。」近日人仔大跌，或者令到香港有部份基督內心不平安，香港有一個聲稱非牟利基督徒組織「以勒基金」，呢幾日就為全球貨幣政策禱告，仲喺FB post埋禱文，單睇標題，絕對霸氣外露：「求主掌管全球貨幣政策」！超勁！唔通以後美國加唔加息，中國放唔放水，都唔好問耶倫、唔好問人行，應該要搵耶穌？

禱文全文可以話係非常精彩，完全睇得出呢位弟兄姊妹對大鱷狙擊人民幣係幾咁咬牙切齒，對沽空股票市場炒家係幾咁恨之入骨！
禱文講到明，希望全能嘅上主可以「攔阻國際大鱷對亞洲貨幣的狙擊，驅逐一切對亞洲貨幣的虎視眈眈。」仲希望主能夠「勒令國際大鱷從原路轉回」，即係點？係咪有日突然有個先知，行過去同索羅斯講：「主不要你沽空人民幣，願你行公義，好憐憫，作光作鹽。」然後索羅斯就講一句：「主，我知錯了，阿門。」然後乖乖退出市場，然後洗心革面，拎錢去炒高人仔跟手做埋牧師宣揚基督救市嘅愛？
禱告又求主可以「監察股票市場上的沽空情況」，咁又即係點？即係每一日你揭開聖經，就會多一頁「沽空報告披露報表」，不如順手加個「聖經版披露易」出埋通告呀，邊個大股東押股就冇得上天堂！
睇到呢度，真係好難唔聯想到，呢個基金應該係重倉人仔同股票，禱告形容，現時係「末世」投資市場！喂！馬太福音24章36節講到明，冇人知道幾時係「末世」：「但那日子，那時辰，沒有人知道，連天上的使者也不知道，子也不知道，惟獨父知道。」所以有理由相信，呢個「末世」，可能係講緊寫呢篇禱文嘅弟兄姊妹個銀包。
不要怕，正如呢位弟兄姊妹所講主能夠，「主是幫助我們的，我們必不懼怕；人能把我們怎樣呢？」係囉，索羅斯最多都係令你啲人仔貶值，只要祈禱後買人仔跌，就冇事了。
最後，求主賜與以勒基金的弟兄姊妹智慧，阿門。大家一齊念一念聖經金句：「一個僕人不能事奉兩個主，不是惡這個愛那個，就是重這個輕那個。你們不能又事奉神，又事奉瑪門。」馬太福音6章24節
「瑪門」係咩？即係錢。
=========================================================
睇完後，我真係唔知畀咩反應