故事背景就係取材於故埃及神話嘅喱一part：在公元前三千年，賽特取代了荷魯斯成為法老的守護神。然而當賽特謀殺自己兄弟的傳說流傳開來後，荷魯斯又重新被替換回來。在荷魯斯與賽特之間發生了一場持續了長達八十年的戰鬥。荷魯斯扯掉了賽特的一粒睾丸，而賽特挖出了荷魯斯的左眼（從此荷魯斯被稱為「獨眼神」）。

當然電影就冇咗扯睾丸喱一part啦！

故事大概係講：喺好耐以前古埃及係由神統治人，而神同人嘅區別在於神比人高大，神流嘅唔係血係金，而且神可以改變外表變做野獸。而古埃及由兩大神統治-歐西里斯同佢嘅兄弟賽特。歐西里斯管治埃及，有草有水嘅地方；賽特管治沙漠荒漠之地。有一日，歐西里斯要傳位俾佢個仔-天空之神荷魯斯，賽特唔滿意就謀朝篡位，係傳位儀式當日殺大佬，諗住殺埋荷魯斯，首先刮咗佢一對眼，正要一刀插死佢時，荷魯斯條女-情愛女神哈索爾出手阻止。之後埃及就被苛政管治，窮嘅做奴隸，反對賽特嘅神就處死，之後男主角同女主角推翻賽特，所以諗住幫荷魯斯偷隻眼，俾返神力佢就開始咗一段經歷！

首先，講下劇情。成套戲總結而言其實幾好睇，而且都幾多笑位，由其係果個黑人智慧之神出現咗之後！

講下演員嘅演技。由於男主角同女主角都算新人？佢地兩個嘅演技真係差少少，有啲位好唔接戲，好明顯，好似有人死咗連喊都唔喊，之後好似無事發生過咁，好怪。

然後，講下特效。由於成套戲都係特效，其實總括黎講都好好，唯獨有一part真係太假，一眼望出係假，就係荷魯斯同男主角係條河同牛頭人隊打，成個畫面就好似打機嘅畫面，同真人嘅顏色唔同，好科幻，怪怪地咁。

接住講下故事入面嘅世界。故事嘅宇宙好大，由落地府，到飛上宇宙。喺宇宙，我地可以見到荷魯斯啊爺-拉喺飛船上，地球就唔係圓，係一塊平板，呈長方體，飛船拉住太陽圍繞地球飛，拉就每晚同條大蟲打，以免蟲食大地。個宇宙觀好有趣。

另外，講下場景。當主角落地府見女主角排隊個畫面真係好似聖鬥士星矢冥皇篇咁，成班人排隊跳落火山口咁！

之後，講下套戲嘅陰謀論。成套戲本身講共濟會個會徽荷魯斯之眼就知乜事啦！
點解神流嘅唔係血而係金？係咪指出當初外星人黎地球嘅原因？搵血庫？金嘅元素嘅重要性？係咪亦指出美國用金同美元掛勾原因，而唔用銀，白金等稀有金屬做貨幣？
而套戲講荷魯斯飛上太空搵佢啊爺拉，而佢啊爺唔係好似平時啲希臘神話，北歐神話果啲咁，住係一個天上嘅陸地-天堂果啲地方，而係喺一架飛船，係唔係暗示共濟會同外星人有關？最後拉又做到荷魯斯做唔到嘅起死回生，係咪指只要搵到果班外星人就有辦法令人長生甚至起死回生？
而電影入面特別有一part講荷魯斯經過試煉以後，發現唔需要有兩隻眼其實都可以有神力，又暗示啲乜？
另外，原本拉賜咗賽特一把神器，之後被荷魯斯攞咗，係咪暗示美國已經擁有外星人所俾嘅外星科技武器？
另外，點解咁多個角色都係白人，唯獨智慧之神由黑人演員所扮演？係咪暗示美國總統奧巴馬有一個知慧嘅決定？
戲入面又特別強調方尖碑同金字塔，主角們都係喱兩道戰鬥，究竟係有意定無意？戲入面當主角同犴人工程師搭升降機上方尖碑，又強調咗方尖碑高2220手長，用50億塊大理石，70億塊金，死咗5390人，暗示啲乜？



最後重點：女主角真係幾靚，仲要大
睇戲果時，前排有幾個小學雞一開始果時全程不停講野，到女主角第一次露面果時，突然大喊：「嘩！真係好靚！」之後佢後面果條友拍佢地幾條友：「唔該可唔可以唔好嘈呀！」全場靜哂，望哂過去，之後就冇講過野！

女主角演員叫寇特妮·伊頓（Courtney Eaton）， 1996 年 1 月 6 日（20 歲），澳洲班伯利，對上一套戲係《Mad Max瘋狂麥斯》，本身係一個model，係一個新人，而且都只係配角，所以佢嘅資料同啲相都唔多！