(原文喺名校SECRETS)
[SPC][Grad] 從前，有個ｏ靚仔，叫做裘財。
裘財覺得，無論讀咩科，做啲咩，都應該賺到錢先值得做。所以佢高中係讀全商科。自己心諗第時入大學，一樣揀硬商科，好好咁讀，一出蒞做嘢就入ｉＢａｎｋ，賺高薪厚祿，咁佢就可以買豪宅、靚車，可以峨大冠，坐皋皮，拖長紳，錦衣華服，魚翅鮑參撈飯，食盡珍饈百味，揮霍無窮財富，傲視親朋戚友。
有一日，裘財見到佢朋友喺度寫嘢，裘財問佢做咩，裘財朋友答佢：「我作文呀，諗住投稿去雜誌，畀街外人睇下。」點知佢一兜冷水：「寫文？賺到錢咩？搵到食咩？哈哈哈哈哈⋯⋯」佢朋友黯然失色。
有一日，裘財路過文科班門口，見到佢個讀文科嘅朋友，喺度吟詩：「先生晦跡臥山林，三顧欣逢賢主尋⋯⋯」佢問佢背緊咩，佢朋友答：「我背緊白居易嘅《詠史》。」點知裘財又話：「讀文科？賺到錢咩？搵到食咩？哈哈哈哈哈⋯⋯」佢朋友悵然若失。
又有一日，裘財出街食飯嗰陣，見到佢有個隔籬班讀理科嘅朋友，揸住本厚筆記，上面有一堆方程。裘財走上前問佢：「咦？咩蒞㗎？你溫緊測驗呀？」佢朋友答：「噢，呢個係Ｐｒｏｊｅｃｔｉｌｅ Ｍｏｔｉｏｎ。係呀，我一陣要測Ｐｈｙｓｉｃｓ，好驚炒添⋯⋯」
裘財聽到就問：「你讀大學想揀咩呀？」佢朋友答：「我想讀理學，我想做科學研究呀。」裘財即刻喺度笑：「做科學研究？哈哈哈哈哈⋯⋯賺到錢咩？搵到食咩？政府都少贊助科學研究，你去做，聽乞米㗎咋！揀商科啦第時，ＧＰＡ高啲，入大行撈，錢途無限！」佢朋友悻悻然走咗，睬佢都生芒果。
正喺裘財沾沾自喜，幻想自己第時讀商科一級榮譽畢業，然後入大行做，億萬財富在一身，有女有車有樓，住三層豪華大屋，好似住喺天堂咁嗰陣⋯⋯
路邊有人嗌佢：「喂！紅燈呀！睇車呀 —— ！」裘財發白日夢，發到神仙飛天咁⋯⋯
「嘭 —— ！」
空氣靜止咗。一陣腥氣，慢慢飄上天⋯⋯
裘財入咗醫院深切治療部，性命垂危。老師知道咗，第二日喺班上面，呼籲同學去探佢，幫佢打氣，等佢撐落去。
佢啲同學私下講：「去醫院探佢？賺到錢咩？搵到食咩？唔只咁，醫院咁多惡菌，一陣我哋惹咗，分分鐘命都冇呀！」
裘財撐咗兩日，終於撐唔住，撒手塵寰。佢死之前嗰刻，喃喃自語：「哎⋯⋯呀⋯⋯我⋯⋯冇⋯⋯得⋯⋯入⋯⋯大⋯⋯行⋯⋯做⋯⋯喇⋯⋯！」
醫院醫生，打電話畀佢阿爸阿媽，告知佢嘅死訊。佢阿爸阿媽，唔單只冇潸然淚下，而且只係冷淡咁答：「喔，我哋放工先蒞認屍啦，等我哋做埋手頭工作先。」
佢阿爸阿媽認完屍，面面相覷，竊竊私語：「搞喪禮、火化⋯⋯閒閒地都要十萬。我哋湊大佢，已經洗咗過百萬喇，咁樣再洗十萬，唔單只賺唔到錢，搵唔到食，反而要我哋自掏腰包，折損己財，不如有得佢啦。是但喺墳場執邊個山頭，搵個地方埋咗佢啦。一言為定⋯⋯」