汪明荃（阿姐）同港鐵主席馬時亨今日喺香港站出席港鐵活動，阿姐仲應司儀要求即場嚟個華麗轉身，事後佢風騷問現場圍觀市民：「你哋影唔影到呀？」其後，馬時亨介紹港鐵生日優惠時，阿姐問他：「依家搭車咁貴，呢個優惠有幾多人受惠？受惠嘅人得好少喎，票價減少少仲好啦。」馬時亨即大讚阿姐係人大政協，提供好多意見，阿姐聽到即話：「我嚟梗係要畀意見啦，唔係費事嘥時間嚟。」阿姐之後仲問馬時亨：「係咪好後悔請我嚟呢？」

馬時亨喺台上仲有講到：「港鐵其實都好準時，不過間唔中有延誤真係冇辦法，機器就機器。」呢個moment阿姐又嚟料：「咁要多啲維修先得o架！」馬時亨就即刻解釋：「我哋每日都有維修o架。」

其實馬主席不斷拆解阿姐嘅妙語連珠，佢轉數真係勁快，例如話阿姐提議出糧後搵一日全港免費搭港鐵，馬時亨即刻將個波踢走：「我哋會交俾行政人選去諗！」馬主席，辛苦晒喇！

阿姐接訪問時直指，香港車費貴、港鐵亦貴：「搞呢啲活動開支貴，又唔係咁多人受惠，減價好啲，或者出糧後嗰日全港免費搭車，一日都好呀。」問到邀請阿姐係唔係想加入港鐵智囊團？阿姐話：「係呀，我係急市民之急，政府有份o架嘛。」另外，問到佢有冇收睇ViuTV？阿姐表示未有時間，亦歡迎更多節目及電視台，至於ViuTV節目引起很多話題？阿姐話：「可能呢啲係佢風格，初頭係咁o架啦。」