香港貧富差距嚴重，唔少政府官員都被鬧爆「堅離地」，不知民間疾苦，特首梁振英今日就同勞福局長張建宗及200個學生，一齊參加由國際青年商會及齊心基金會合辦的貧窮體驗日，紆尊降貴做窮人，了解一下窮人之苦。
活動結束後，梁振英喺個人facebook留言話佢個角色是三代同堂、一家五口的單親家庭中月入9000幾蚊的中年洗碗工，「我們和其他組一樣，努力工作，出糧後交租、交學費、買車票、買罐頭和即食麵等食物，通過『全家』齊心協力，勉強略有盈餘」。
fb內容冇講點樣可以9000幾蚊養一家5口仲可以「略有盈餘」，但梁振英話呢個活動令佢回憶起小時候，當時其父當警察薪水還可應付日常開支，但要買樓就要另想辦法，結果靠佢媽媽帶領全家日以繼夜「穿膠花」儲錢。佢話那些年，半年先去一次茶樓飲茶，一家人已可以開心幾日。
梁振英話今天問過同學：「在衣食住行當中，窮人生活壓力最大的是哪方面？」結果全場學生都舉手話係「住」。梁特首指對於基層市民嚟講，房屋同貧窮問題係雙胞胎，佢仲即刻大賣廣告，話「上任後已立即在房屋問題上勇往直前的為大家打拼」，仲話「現在問題的解決已經有了曙光」添喎。
循例報一報，呢個Post上載3個鐘，網民嬲嬲數目已迫近4000個！
http://news.mingpao.com/ins/instantnews/web_tc/article/20160424/s00001/1461507324884