「喂，你今個月已經遲咗4次，再多一次就出Warning letter。」「係，我會準時架喇。」下次下次，下次大概可以。無辜中槍的同事，其實好想講自己經常遲到係因為返工路途遙遠，「大佬，我住屯門架。」

「咁又點，返得呢度就預咗。」身邊總有人會咁樣回應。水浸黃雨都要塞住過海，8號波未落就要仆去等車返工，新界人深明這些苦況，住屯門的就不在話下。

有幾句說話，的確令屯門人好嬲又好笑︰

1. 「屯門公路塞車是常識吧！」
商業區如中環、銅鑼灣、東區、九龍東等在繁忙時間多數塞車，通常晚上9點後情況稍有改善。至於屯門人出九龍甚至過海，事必要經過屯門公路。呢條路（相當有嫌疑），基本上係24小時都塞（除非閣下選擇轉車轉到頭暈兼永遠無位坐嘅西鐵，就可以Skip咗呢段）。如果在只有一條大路通往世界的情況下，遇上落大雨、炒車或壞車，想準時到公司都幾難。

2. 「屯門係咪有好多牛架？」
草地、郊區、村屋又或者牛，都係外界對屯門的普遍印象。事實上由60、70年代開始，屯門已經開始發展成新市鎮，現時區內已建有多個大型商場，加上近年有不少豪宅落成，人煙可能稠密過自己返工嗰區。至於「牛」這回事，可能要去西貢、塔門或者大嶼山先有得野生捕獲。

3. 「咁你一個月咪洗好多車費？」
（新界人一律適用）
係呀！仲可能係天文數字。假設每日返工過海來回需要$50，每星期返5日，一個月正好要$1,000車費（假設星期六、日在家做毒男）。以畢業生的人工中位數$1.3萬計，車費已經等同自扣人工7.7%（未計飯錢、買衫錢、家用等等）。在車費只加不減的機制下，份糧只有無限燃燒。

4. 「你過海要幾耐？」
過大海去澳門，可能仲快過去港島。去西環、中環已經小兒科，假若閣下公司位處九龍東、港島東，來回需時3至4粒鐘，車程夠去大陸、台灣有餘。你又有無試過當約完朋友出街食飯，踏上歸家路時，每次對方都快過你返到屋企。當自己仲企喺架巴士度迫，朋友已經準備上床大覺瞓。一個字︰灰。

「呀邊個，遲第5次喇喎！住得遠就預早啲出門口嘛。」

好似連個天都唔想我返工，「老細，不如你試下住屯門丫？」

http://www.ctgoodjobs.hk/article/老細-不如你試下住屯門丫/1144-16924