作者：劉病已

注意：本文係畀超新手睇嘅，老手可以直接上一頁，或者幫手睇下我有咩講錯 。

引子　何處是東京？

嚴格嚟講，日本冇一個「東京市」。「東京都」倒是有一個。咩係「東京都」？話說日本嘅一級行政區（即是國家以下嘅最大分區，類似中國嘅「省／自治區／直轄市／特別行政區」咁樣）係「都／道／府／縣」，「都」只有一個，就係「東京都」。

（BTW，「道」=北海道，「府」=大阪府、京都府，其他全部都係縣，最出名嘅應該係……福島縣？）

（再BTW，日本有二十個「政令指定都市」，即是特別大嘅城市。其中唔包括東京，因為東京係特別嘅。 而唔係「政令指定都市」嘅城市，基本上都可以當做係鄉下。 ）

東京都其實好大，大家睇下google map就會見到，大到連喺太平洋中間嘅小笠原群島都屬於東京都。

而大家一般最常講嘅「東京」，其實係東京都（唔計啲島）東部、臨近東京灣嘅廿三個「區」，又統稱為「東京都區部」。



一啲廣為人知嘅東京地標，例如東京鐵塔、淺草雷門，或者靖國神社，同埋天皇住嘅皇居，都係喺23區入面。

但因為東京實在係太大嘅城市（我會稱之為「city of cities」），以致佢周圍嘅其他城市都十分繁華，所以東京嘅鐵路網，好自然就延伸到周邊嘅地區。因此本文標題為「大東京」，包含東京23區及周邊嘅地區：大約西至八王子市、東至千葉市、北至埼玉市、南至橫濱市。

而講到東京嘅鐵路，冇可能唔講嘅，當然就係山手線。

（待打）