今次開呢個po就係想淺談一下玄學，如果想知道玄學大約係點，咁呢度就會有一個清晰嘅討論，而就此會特別專注討論中式玄學，至於塔羅、星座、生命靈數之類就留比其他高手介紹啦。會以對答形式黎講述，希望冇咁悶。而我都會傾向講多少少占卜，因為我相對熟悉。

『中式玄學到底係乜野？係咪即係好似街邊睇相、算命個類？玲玲師傅批英女王八字咁好馬後砲姐……』
測字先生曰：中式玄學包括醫卜星相，亦都包括風水。街邊睇相、算命屬於以玄學謀生嘅方法。至於峰哥、玲玲個類，就係出名玄學家。實力同名氣並唔一定成為正比，出色嘅睇相佬，口才一定要好先搵到食，畢竟世界上只有一個麻衣布相，邊有咁多個？

『命係點樣算架？點解有人算命咁準？有人唔準？唔準嘅係咪神棍？』
測字先生曰：算命大體分左兩類：八字、紫微斗數。八字以四柱八字為主，即係干支曆法，紫微斗數以太陰曆為主。紫微斗數同八字各分出唔同派別，以八字黎講，有盲派、子平八字，而子平八字又有旺衰、格局派、書房派等等。咁多派別，自然準度上有誤差。其次，同一個時辰有唔同刻數，所以都會誤差。其三，問命者可能搞錯左自己時辰八字，所以算唔準。其四，網絡算命師傅質素不一，有老手、有新手、有神棍，準度自然不一，所以唔準都有可能批命者屬於新手級別，缺乏經驗。我認為要多多包容，新手始終需要練習機會。不過總唔可以子正換日、子初換日不分就出黎批命，會誤導他人。其他祿命法有：鐵版神數、南極神數、七政四餘、大六壬、命禽。

『咁占卜呢又係乜野一回事？既然算到，又點解要占呢？點解測字先生有時唔準？』
測字先生曰：占卜體系比祿命體系更加多，而且用神更加難捉。目前占卜有古三式（太乙、遁甲、六壬）、梅花易數、文王卦、演禽、小六壬、金口訣、測字。占卜講求觸機，心境取決於八成，越簡單嘅術數，心境要求就越高，例如梅花易數同測字。算命通常就住一個人嘅命運，但係占卜就廣泛，占卜可以係任何一件事、一個計劃、國運、命運、決定，一般姻緣、事業、學業算命就已經答道。但例如某一樣野會點發展、聽日天氣如何之類就要依靠占卜。測字先生唔準原因甚多，個人功力不足為主。其次，個字並非問卜人突然想出，而係精挑細選之下揀出。再者，問題模棱兩可，測事業、測姻緣，所以答案都係大圍而且唔仔細。測字本身定應期都唔容易掌握，心境一亂結果就唔準了。

『睇相佬都係9up，所以睇相風水好呃錢架，唔信好過信！』
測字先生曰：以玄學謀生必定收你錢，雖然我甚少收錢，但都係要對方請我飲咖啡……睇相分左：面相、掌相、摸骨三大體系。其中摸骨最勁，前兩樣就最好配合命理使用，先可以發揮最大功力。倘若相由心生有理，咁睇相亦都有理。相學略略講完，就可以講下風水。其實堪輿術並非迷信，而是實在，當然有唔少人利用風水個名搵食。但係風水本身可以興旺自己，扭轉逆勢。講緊嘅當然唔係宜家九宮飛星，飛星立坐向屬於風水基本，真正風水係要周圍走，搵出合適位置。風水畢竟唔熟悉，所以都係避免講多錯多，就此擱筆。不過業餘風水師、自學風水師並不可信，風水唔同命理占卜，非書能所詳。

有時間再講深入少少。