政情：招顯聰成立英獨聯揚言發假誓

前「香港人優先」成員招顯聰尋日下晝宣布成立「香港歸英獨立聯盟」（英獨聯），主張香港「法理歸英，制憲獨立」，佢透露已設計自稱為「香港共和國」旗幟，原定尋日即場揮動，但因未有攜帶所以作罷，佢揚言會喺七一公開揮動「香港共和國」旗幟，一旦進身議會「擺到明發假誓」，即於宣誓就任時讀出「香港獨立宣言」。

挑戰政府原則底線

招顯聰報稱喺七一揮動「香港共和國」旗幟，以及事先張揚「發假誓」，擺明挑戰政府原則底線，考驗政府如何應對，究竟主張港獨人士會否於報名之時，未有簽署聲明「擁護《基本法》和保證效忠香港特別行政區」，早已引起關注，甚至未獲開綠燈「過關」；若然有人真的「發假誓」，又會唔會有手尾跟，凡此種種均值得拭目以待！

而於英獨聯成立後不久，「香港歸英運動」於社交網站發聲明與其劃清界線，稱兩者冇任何關連，強調佢哋係一個義務組織，旨在推動香港及英國具建設性嘅關係。