前排去見第一份工，終於體會到後生根本係原罪

前排去見第一份工，開波時都幾好嫁，入到房後講下開場白，我本身係呢間公司實習過一排，佢話問返啲同事，都幾滿意我做野快手有交帶，而我都好適合呢個職位。我心諗，係咪咁好彩，一見就掂呢，點知in落去，先覺得唔對路。

呢位自稱有十幾年資歷嘅HR連自我介紹都未聽，就一撚嘴咁係度講，差在要拎本簿仔抄底佢到底要我答幾多個問題。不過唔緊要，做開interpt呢啲痴線野嘅，幫講野1999嘅人搵段落大意簡直係強項。我好自信咁一邊微笑，一邊聽佢嗡，不外乎係時間管理之流嘅野，腦海已經自動列晒點，相應答案都浮現晒出黎。講到穩定性，佢突然間問：「你有無諗住讀master？」估唔到，形勢會突然急轉直下。

依家諗返，我唔應該答「有」。我嗰間唔係出名大學，報part time master洗番個底都係人之常情。考慮到工作經驗重要，所以畢業即刻搵工，一邊讀一邊做野，辛苦少少都唔緊要。呢個時候，個呀叔人生導師上身，擺起個款咁講：「我嗰時都係一路做野一路讀書，邊有依家咁幸福，可以做做下野走左去讀書。」佢隨手揭下我份cv：「依家個個都有degree，咁個個都有master嗰時，你又去讀doctor喇喎。」我嗰時有啲失望，唔係因為聽人說話，而係因為呢間我好想做嘅公司原來都只係想請個奴隸，想叫你無限OT。

接下黎成場面試，我好似做左樹窿咁，聽個呀叔係咁係度抱怨，連講下自己嘅技能同工作經驗嘅機會都無。「講到穩定性，」呀叔繼續嗡：「依家啲後生仔成日請假去旅行，又郁啲就病，都唔知香港生活質素係咪真係咁差。」原來做呢份工仲要唔病得，有年假都唔比放。「不過公司好好，有比錢佢地睇醫生。」真係多謝晒。

面試完左之後，就去做筆試，內容係實習做開嘅野，水準完全無問題，呢點我好有信心。筆試後，理應係見department head嘅，但個呀叔同我講，呀head臨時開會唔知要等幾耐，所以叫我返去先，下星期再約。當然，下星期無收到任何電話。

老實講，當初可以入到去做intern真係好開心。佢係嗰個界別都算係出名，每年都會搞大型活動。實習期間學到好多野，見到自己有份整嘅野出街時，感動到好似生完仔咁。係嗰度做左兩年，負責我嘅中級員工兩年都唔同人，一直以為係好難續約，後尾先知道原來個個做唔夠一年都頂唔順要走（一正二副）。第一年實習係零人工，in charge同負責請我嘅中級員工好好人，我純粹鍾意呢一行先apply，第二年以PT形式繼續做，先有返啲銀兩。先唔講內部工作環境點，一間大機構嘅HR竟然充滿歧視同偏見。

年輕一代就係被標籤嘅一群。佢地成日病，成日去旅行，嬌生慣養，面對呢啲指控，無論幾多例證都好（何況年假用得合情合理又何罪之有），啲中坑都唔會信你，因為佢地深信呢個世代就係咁。老一輩面對新一代人嘅威脅，唯一方法就係等佢地添上更多污點，黎保住自己嘅地位同威嚴。90後，一到職場就要背負許多莫須有嘅罪名。樣樣都應該識，瓣瓣都要掂，一出世識行識走十八般武藝樣樣精通，要捱得鬧得比人勞役都唔出聲，一有差錯，負責的不只是你，是整個群體。香港的年輕人就係咁被扼殺，被捏住喉嚨，做戰戰兢兢咁生活嘅囚犯。

見第二份工時，有個日本人老細同我講：「初入職時，我並唔期望你有咩output，你只要努力學習我地公司嘅產品就可以。」當時好感動，但都好悲哀，感動嘅係有老細願意由零教起，悲哀嘅係香港幾時先可以接納，而唔係敵視年輕一代？

http://www.vjmedia.com.hk/articles/2016/07/07/137743/前排去見第一份工，終於體會到後生根本係原罪/