http://m.mingpao.com/ins/instantnews/web_tc/article/20160708/s00001/1467988702212

今屆立法會會期即將完結，除咗有港台節目《議事論事》邀請咗一班議員大展歌喉之外，今日全體立法會議員舉行晚宴，餞別廣受敬重嘅立會主席曾鈺成時，曾主席亦都改編咗葉振棠嘅名曲《忘盡心中情》，仲即席演唱，歌詞入面仲論盡「AV仁」同「元秋」等多位同事，令現場爆發陣陣笑聲。

民建聯立法會議員葛珮帆今晚喺facebook直播，片中曾主席喺色士風伴奏下，唱出8年來主持議會嘅心聲：「忘盡心中情，遺下愛與癡」、「會議廳苦中自娛，立法會好多奇事」。

之後佢仲對諸位同事「大唱特唱」，何俊仁「服左AV仁，?女要用手機」、成日俾人影到開會時訓覺嘅黃定光「象哥猛扯鼻鼾，食太多話梅陳皮」、「波蘭蜜友」梁國雄「長毛好冇譜，亂掟嘢撳唔住」、「毓民鬧人唔使擇日子」，仲話「拉布唔怕臭又長，一剪話咁易」。

不過主席毫不偏心，皆因其他建制派同黨友都「無一倖免」，話「嫻姐張宇人、大輝仲有怪醫，鬧政府似足泛民，問契仔稟西環未」、「元秋搵嘢講，用肺就容易」、「Tree根開邊瓣只有天知」。曲終最後幾句「發咗好多夢，留下笑與悲，立法會此番別離，莫再講那非和是」，睇嚟主席都十分感慨。

除咗改編歌之外，主席仲搵埋做過舞蹈老師嘅太太伍嘉敏伴舞，只見佢喺一旁唱住羅文嘅《紅棉》，曾太就圍繞住佢翩翩起舞，又一字馬，又拗腰，真係舞藝精湛呀。